Dec 19, 2008

عن ابراهيم عيسى والتطبيع

هل تذكرون الفيلم السينيمائى(السفاره فى العماره)؟ أعتقد أن كثيرين قد شاهدوه ,معظم من شاهده وأنا معهم اعتبرنا الفيلم موقفاً حاداً شديد الوضوح ضد التطبيع مع عدونا الصهيونى , ولكن لأن طبيعة الفن وطبيعة الدنيا عموماً هى تعدد زوايا الرؤيه للحدث الواحد,فقد رأى البعض أن الفيلم يمكن اعتباره عملاً تطبيعياً صرفاً , فاظهار كراهية الشعب المصرى للكيان الصهيونى لم يأت بجديد وانما الجديد كان هو ظهور السفير الصهيونى على الشاشه لمده طويله عن طريق ممثل كبير له قبول وهو لطفى لبيب,اعتبر البعض ذلك خطوه تطبيعيه تتخفى فى ثوب رفض التطبيع

الحقيقه أننى لا أنوى الحديث عن الفيلم , كانت تلك مقدمه لسؤال أريد طرحه,هل ما تفعله جريدة الدستور منذ صورها من مقاومةٍ لمخطط توريث الحكم فى مصر والذى يبدو وكأنه حائط صد ضد حدوث التوريث,هل هو فى الحقيقه دعماً لتلك الخطوه وتسويقاً لها بين البسطاء من أبناء شعبنا؟ بمعنى جعل كلمة التوريث مشاعاً على كل الألسنه بعد أن كانت كلمة جديده قبل 4 أو 5 سنوات؟ه
هل يعد موقف الجريده تمهيدا لحدوث التوريث عبر إشاعة اليأس فى النفوس من استحالة تحسن الأوضاع عبر تسليط الضوء المستمر على الفساد الذى ينخر فى عظام الدوله وكأنه بلا علاج ؟ه
بمعنى أخر,هل خدعنا ابراهيم عيسى؟ ام أن الأمر كله يرجع لعدم ثقتنا فى وجود قلم شريف يكتب فعلاً لوجه الله فى هذه الفتره حالكة الظلمه؟ه
هل يقصد ابراهيم عيسى عندما يصف الأمه بالخنوع والسلبيه والجبن مراتٍ عديده فى مقالاته هو استثارة الهمم فعلاً أم اشاعة اليأس واظهار عدم استحقاقنا لحياةٍ أفضل كما أعلنها نظيف قبل ذلك عندما وصف الشعب بعدم النضج لاستقبال الديمقراطيه؟ه
هل عيسى بالفعل جزء من لوبى متأمرك يتحرك لأهداف غير معلنه كما يقول منتقدوه بعد مقالته الأخيره تعليقاً على حادثة الحذاء(وهى مقاله سافله بالمناسبه كما أراها) ؟ه
هل من الضرورى أصلا تصنيف الإنسان وقولبته كأن نقول هذا متأمرك, وهذا إيرانى الهوى,وذاك جزء من اللوبى الصهيونى فى الاعلام المصرى وهكذا,أم نحاسب الكاتب على مواقفه بالقطعه,أى نقول له احسنت أو أسأت حسب ما يكتبه كل مره, هل مازال هناك ثوابت أصلاً كالعروبه والقوميه والأمه الواحده أم يجب الشك فى كل شئ وإعادة الحسابات كل يوم ألف مره؟ه
الحق أننى لا أدعى امتلاك الإجابه..فقط أطرح التساؤلات لعل احداً يفيدنى, ويريحنى.

Dec 11, 2008

إرهاق

يا شوقا يعصف بكيانى ..فارقنى يوماً , قد أنساها...أو أتنفس دون حنين , إلى امرأةٍ...لا تدرى أنى أعشقها , لاتشعر أنى لاأغفو ...والقلب حزين
أيا امرأةً , لعينيها..أجوب الكون ترحالاً , بلا شئٍ... سوى حلمى , أحسينى ...وضمينى , فطول البعد أرهقنى ...ومشتاقٌ إلى النوم

Dec 6, 2008

..............

مع نفسى...ذلك أفضل جداً

Dec 4, 2008

الخوف قواد..فحاذر أن تخاف

قد آن ياكيخوت للقلب الجريح
أن يستريح
فاحفر هنا قبراً ونم
وانقش على الصخر الأصم
يا نابشا قبرى حنانك ، ها هنا قلبٌ ينام
لا فرق من عامٍ ينامُ وألف عام
هذى العظام حصاد أيامى فرفقاً بالعظام
أنا لست أُحسب بين فرسان الزمان
إن عد فرسان الزمان
لكن قلبى كان دوماً قلب فارس
كره المنافق والجبان
مقدار ما عشق الحقيقة
أنا لا أجيد القول ، قد أُنْسِيتُ فى المنفى الكلام
وعرفتُ سرَّ الصمت .. كم ماتت على شفتى فى المنفى الحروف
الصمت ليس هنيهةً قبل الكلام
الصمت ليس هنيهة بين الكلام
الصمت ليس هنيهة بعد الكلام
الصمت حرف لا يُخَط ولا يقال
الصمت يعنى الصمت .. هل يعنى الجحيم سوى الجحيم ؟ه
لو كان يعرف بالقلوب الناس لم يصفعك دوماً بالسؤال
- كل ابن كلب -
من أنت ؟ .. كالقفاز فى عينيك يرمى بالسكين قلب
وترى الكلاب تتيه كالفرسان .. والفرسان أضيع من كلاب
يا .. كلاب كبدى خذوه
يا ناهشى الأكباد هاكُمْ فانهشوه
وليرحم اللّه الضحايا .. يرحم اللّه الضحايا
قالوا قديما : ( لاتخف ان قلت ، واصمت لاتقل
ان خفت ) .. لكنى أقول
الخوف قواد .. فحاذر أن تخاف
قل ما تريد لمن تريد كما تريد متى تريد
لو بعدها الطوفان قلها فى الوجوه بلا وجل
الملك عريان .. ومن يفتى بما ليس الحقيقه
فليلقنى خلف الجبل
انى هنالك منتظر
والعار للعميان قلبا أو بصر
وإلى الجحيم بكل ألوان الخطر
مقاطع من "لزوم ما يلزم" لنجيب سرور

Nov 22, 2008

وداع

ألا زلت تصرين أن الوداع لم يكن لائقاً؟ ألا يكون الوداع لائقاً إلا بجرحٍ يتبعه البكاء؟ ماذا اذن إن كان الفراق أكبر من دموع الدنيا كلها؟ وماذا إن كنت أشتاق البكاء ولا يأتينى؟ه
ما أمرّ انخلاع القلب منى ,وما أعز البكاء.
تقولين أن سلامى عليك كان سلام الكرام , ولا تعلمين أن ما بيننا لا يسعه كل كلام الناس من ألف عام..ولا يبوح به تلامس كفين أو حتى عناق لألف عامٍ اخرى
كم أتمنى أن أعود إليك...لا أقول تعودين إلى ,كيف وأنت تسرين فى العروق , ويتكئ قلبك على كل الخلايا
رغم المسافات التى ظننتِ أنك بعدتيها عنى ,لم تغيبى عن مدارى لحظة واحده...فعيونى فى أول طريقك ,وقلبى فى آخره....وبينهما يمتد حنينى كسحابٍ يظللك ,ويقطر شوقاً على وجنتيك
كم أشتاق اسمى من شفتيك....ليتك ناديتنى به ولو لمرة أخيره , أشتاق حتى (لا أحبك) التى لم أصدقها أبدا, لأنك لم تقصديها أبدا
هل آلمتك يوما؟ ها أنا الآن أتألم بكل شهيق لا تعطره أنفاسك
ألا تسامحين؟ه
ألا زلت تصرين أن الوداع لم يكن لائقا؟

Nov 15, 2008

أتدرين؟

أتدرين
بأن مواكب العشاق قد مرت على قلبى
وان نسائم الأشواق ترحل فى شرايينى
أبثك لهفتى سراً
وحبك سر تكوينى
عيونى تشتهى قرباً
أجيبيها
وضمينى
ثوانٍ وحدنا عمرٌ
وبعض الدفء يكفينى
أريدك فرحةً كبرى
من الأحزان تشفينى
بقلبك أشتهى وطناً
وبيتاً سوف يحمينى
أتيتك حاملاً حلمى
بربك لا تردينى
أقدم راضياً عمرى
أترضين؟ه
أجيبينى

Oct 25, 2008

ما أوسع البكاء

أتعيش عمرك مرغماً
والقهر ظلاً يتبعك
ابدأ خلاصك بالبكا
فالكل قد يبكى معك
أرسل دموعك..
صبَّها
اغسل همومك كلها
أم أن قهراً يمنعك
إن ظل حزنك خافتاً
من يا ترى قد يسمعك
أطلق صراخك في الفضا
عهد احتمالك قد مضى
وسكون حزنك أوجعك
يا قلب عمرك ما انتهى
اكسر قيودك..ألقها
فبدونها..ما أوسعك

Aug 28, 2008

ايه شعبى الحبيب المهاود

كل ما أعدى من قدام مجلس الشعب لازم أتفرج , معرفش ليه ,المهم كل ما أبص أشوف الجمله اللى مكتوبه على الحيطه ببنط كبير أوى خالص(الديمقراطيه هى توكيد السياده للشعب) كلام حلو جداً وحياة ربنا,بس يعنى واحنا مالنا؟ يعنى لو سألت الناس فى محطة سعد زغلول ولا التحرير(محدش يقول عليها السادات لو سمحتوا) وأنا رايح المنتئه دى ولا راجع منها عن رأيهم فى الجمله دى تفتكروا هيكون ردهم ازاى؟ فى الحقيقه أيها الأخوه والأخوات انا متوقع ان كلهم هيقولوا يعنى ايه ديمقراطيه ,نسبه كبيره هتختلف حوالين معنى توكيد ومعنى السياده,وبعدين بالتأكيد الأكيد هتسمع كلام من عينة شعب مين يا ابن الشششششششششعب ,والراجل الأخير ده بالرغم انه قليل الأدب شويه وابن شششششششششعب صحيح , بس بيسأل سؤال مهم برضه, يعنى ايه الشعب بجد؟ يعنى كل مجموعه من الناس جه نصيبهم انهم فى مكان واحد يبقوا شعب؟ ولا لازم مجموعة الناس دول يكون فيه بينهم تاريخ وثقافه و حاجات كتيره مشتركه , ويكون القاعده انهم بيحبوا بعض وليهم مشروع مشترك , وعدو مشترك وواضح ,طب الحاجات دى موجوده عندنا؟ يعنى لوسألت 10 بنى ادمين فى الشارع ايه مشروعكم القومى,بغض النظر عن الاختلاف برضه حوالين معنى المشروع ومعنى القومى والراجل ابن الشعب اللى هيبقى واقف حاشر نفسه ده, تفتكر هتلاقى اجابه عن السؤال؟ طب لو سألت مين عدوك الرئيسى وانت متوقع مثلا تكون الاجابه هى الكيان الصهيونى,هتسمع الاجابه دى فعلا؟ ولا كل واحد دلوقتى عنده وطنه الصغير اوى اللى على قده واللى فيه مشروعه وعدوه كمان,يعنى واحد مشروعه القومى انه يتجوز الحته بتاعته, وعدوه هو ابن خالتها الرخم اللى حاطط عينه عليها, ما اعترضناش يعنى بس هو كده وبس؟ ولا واحده مشروعها انها تخس وتبقى حلوه ومزه واحلى بت فى النادى ولا فى الجامعه,فيه ناس عندها احلام مهمه جدا صحيح بس برضه فى اطارهم الشخصى او بالكتير فى اطار اوسع شويه فيه عيلتهم او اصحابهم بس, باختصار يعنى احنا أمَّه فعلا ولا ناس اترصت جنب بعضها بالصدفه؟حد فينا بيحلم ان حلمه الشخصى يبقى جزء من حلم كبير؟ لو كانت الاجابه لأ يبقى المشكله مش فى الحكومه والحاج أبو جمال حتى لو كان هو السبب فيها, للأسف الحل ما بقاش مجرد انه يمشى,طب ما هو هيمشى ويسيبنا زى ما احنا, اللى شاغل بالى دلوقتى فعلا,الجمله دى اللى على الحيطه اتحرقت ولا النار جت عندها وأزحت؟

Aug 23, 2008

على باب الكريم

دعاء الهم والحزن

اللهم إنى عبدك , ابن عبدك , ابن أمتك , ناصيتى بيدك , ماضٍ فىّ حكمك , عدلٌ فىّ قضاؤك , أسألك بكل اسمٍ هو لك , سميت به نفسك , أو أنزلته فى كتابك , أو علمته أحداً من خلقك , أو استأثرت به فى علم الغيب عندك , أن تجعل القرآن العظيم ربيع قلبى , ونور صدرى , وجلاء حزنى , وذهاب همى
أحمد 1/391 وصححه الألبانى

*

*

*

اللهم إنى أعوذ بك من الهم والحزن , والعجز والكسل , والبخل والجبن , وضَلَع الدين وغلبة الرجال

البخارى 7/158
*
*
*
*
دعاء الكرب

لا إله إلا الله العظيم الحليم , لا إله إلا الله رب العرش العظيم , لا إله إلا الله رب السموات ورب الأرض ورب العرش الكريم
البخارى 7/154 ومسلم 4/2092
*
*
*
*
اللهم رحمتك أرجو فلا تكلنى إلى نفسى طرفة عين , وأصلح لى شأنى كله , لا إله إلا أنت
ابو داود 4/324 واحمد 5/42 وحسنه الألبانى فى صحيح أبو داود 3/959
*
*
*
*
لا إله إلا أنت سبحانك إنى كنت من الظالمين
الترمذى 5/529 والحاكم وصححه ووافقه الذهبى 1/505 وانظر صحيح الترمذى 3/168
*
*
*
* الله ربى لا أشرك به شيئا
أخرجه أبو داود 2/87 وانظر صحيح ابن ماجه 2/335

Aug 8, 2008

ولو أقدر

ولو أقدر
أنور بالمنى ليلك
أكون نجمه ولا أتأخر
وأعمل حبنا جنه
نعيش فيها ونتطهر
من الدنيا وما فيها
أنا عاوزك
ومش أكتر
مانا أصلى
ماليش ف الدنيا دى حاجه
وقلبك مش هنا جنبى
بحس بروحى بردانه
ونور الشمس متخبى
ودمعة شوق محاوطانى
تقول البعد مش ذنبى
وفى الزحمه
بحس الوحده من غيرك
وبحلم نلتقى تانى
بحس اديكى ف اديا
واحس عنيكى حاضنانى
وبصحى التقى روحى
وحيد والحيره ساكنانى
اتارى كل ده فكره
وسكرة حب واخدانى
وأقول بكره
هنرجع تانى نتقابل
ويكبر حلمنا اكتر
هعيش من تانى ف عنيكى
ويصبح صبرنا سكر
وأقولك ان انا صدفه
قابلت عنيكى ف الزحمه
بكل براءه شدونى
وبالطيبه وبالرحمه
سمارك حته من بلدى
وطيبتك هى عنوانك
سدود ياما كتير بينا
هعديها علشانك
انا فرحه ملكتيها
انا ريشتك والوانك
تعالى لونى حزنى
وحسى قلب عطشانك
ف نفسه يرتوى منك
ومن عطرك وريحانك

Jul 31, 2008

سؤال فى الحريه..وعنها

زميلتى فى العمل كانت تحدثنى عن مشكله نفسيه لاحدى بناتها عمرها 16 سنه,ولأنى أعرف أن أولادها مازالوا أطفالا,استفسرت منها فقالت انها احدى بناتها فى الكنيسه,عرفت من زميلتى أنها تخدم فى الكنيسه..وحسب ما فهمت أنها مسئوله عن مجموعه من الفتيات تعطيهم عظات روحيه وتتواصل معهم وتساعدهم فى حل مشكلاتهم,هذا غير دور الكنيسه فى مختلف المجالات ككيان اجتماعى متكامل يكاد يستغنى به الزائر عن مؤسسات كثيره فى المجتمع كالمسرح والمكتبه وربما السينما لا أعرف. كل ما سبق لا اعتراض لى عليه(حتى وان كنت أرى أن هذا من ضمن الأسباب الرئيسيه لعزلة المسيحيين فى المجتمع والتى يشتكون منها),الملفت للنظر أن هذا الحوار معها تزامن مع خبر قرأته فى الدستور المصريه نشرته بتاريخ الأحد 27 يوليو فى صفحتها الأولى,مضمون الخبر يقول أن أمن الدوله بمحافظات الصعيد(بنى سويف والمنيا وأسيوط وسوهاج وقنا) استدعت أئمة المساجد ممكن كانوا قد تقدموا بطلبات للحصول على إذن بالاعتكاف وإقامة صلاة التهجد فى العشر الأواخر من رمضان وأخبروهم أن طلباتهم مرفوضه وكان المبرر أنها (أفعال تؤدى إلى حشد الناس ونقل الفكر السلفى الجهادى بينهم),وتضيف الجريده على لسان أحد الأئمه أن الضابط أخبره أن الاعتكاف يواكبه حلقات حول أمور الدين والدنيا(وطبعا النقاش بيتطرق إلى عدالة الخلفاء الراشدين والشورى فى الاسلام والوقوف فى وجه الحاكم إذا لم يقم بتطبيق الشريعه الاسلاميه),مابين القوسين منسوب للضابط. يدور برأسى سؤال واحد الآن:ما هو تعريف حرية ممارسة الشعائر الدينيه؟

Jul 28, 2008

القانون اخد مجراه

وآدى حالنا
انا كنت بقول لنفسى دايما فاضل لنا فى البلد بنت ال ....القضاء,بنتحامى فيه
لحد ما اكتشفت ان مجرى القانون فى قفانا كلنا

Jul 18, 2008

حصل الأسبوع اللى فات ..يا مينز

مش هفضل كده على طول
مش هستنى العمر يعدى
مش هسكت لازم أقول
قد ما هاخد قد ما هادى
انا دلوقتى براجع نفسى
قبل ما الايام تفوت
وعشان حاجات تعيش
حاجات كتير لازم تموت
مش كبرياء
لكن بصلح كل شئ فيا انكسر
ومن الغباء انك تعيش
زى الملاك بين البشر
يعنى براجع نفسى
واللى زمان انا عشته لغيرى
انا دلوقتى هعيشه لنفسى
الأغنيه فى الرابط ده
الكلام اللى فوق ده بسيط جدا لما تقراه كده,بس جرب تسمعه بصوت شيرين فى الشريط الاخير(بطمنك) يخرب بيت ده صوت وده احساس.ه
شيرين شايفه انها عايشه زى الملاك بين البشر,وده حقها وحق اللى كتب الكلام يشوف نفسه ملاك , انا مش شايف انى ملاك ولا حاجه,بس غير كده انا هعمل زى ما الاغنيه بتقول بالظبط , هختلف بس معاها ان ده فعلا كبرياء,وماله الكبرياء يعنى؟ وحش الكبرياء ده؟ ده فله جداً.ه
. . . . الاسبوع ده خسرت صديق, أو هو خسرنى مش عارف,لا انا قلت ولا هو قال اننا ما بقيناش اصدقاء,بس احساسى بيقولى كده,والغالب ان احساسى صح,حتى لو كان تفسيره لتغيره من ناحيتى انه متضايق لسبب خاص,الغريب فى العلاقات بين الناس ان طرف من طرفى العلاقه يبقى متصور ان له الحق المطلق ينهيها وكأن التانى ده مش موجود اصلا,ومش من حقه يعرف ليه.ه
. . . . بس برضه الاسبوع ده كسبت معرفة انسان رائع جدا,المعرفه جديده لسه بس انا بمشى ورا الانطباعات الاولى,اللى هى بتدوم دى,فاكرينها دى بتاعة الاعلان,واللقا نصيب فعلاً .ه
. . . . نزلت وسط البلد , والبلد يعنى القاهره,على اساس انه بلدنا يعنى القاهره والقاهره يعنى بلدنا,والاقاليم دول ما جوش النهارده,المهم باروح وسط البلد دى (اللى هى طلعت حرب وما حولها) ادخل المكتبات اللى هناك واروح التكعيبه بالليل لما احب اقابل خالد افندى عبقادر على اساس انه الجدع معندوش نوبايل واللى يعوزه يطلبه على تليفون اسامه قهوجى التكعيبه.ه
رحت دار الشروق اتفرج على عناوين الكتب, معظم الناس اللى بالنسبه لى نجوم فى السما كتبهم هناك,المسيرى والغزالى والعوا ومحمد عماره وفهمى هويدى, كنت اشتريت اخر مره قبل دى فقه السيره والحق المر وليس من الاسلام للشيخ الغزالى رحمه الله وكمان فى المسأله القبطيه حقائق وأوهام للدكتور عماره وهو كتاب مهم جدا ممكن يبين بنسبه كبيره اسباب الاتهامات المتكرره للرجل بالتطرف واثارة الفتنه لمجرد انه بيقول للغوله عينك حمرا,مع انه لو ركزنا شويه هنلاقى عينها حمرا فعلا.ه
سألت مسئول البيع عن كتاب قذائف الحق للرجل العظيم محمد الغزالى فقالى مش موجود,قلتله يعنى مش موجود اصلا فى السوق؟ قاللى م الاخر ما تدورش عليه,فى الحقيقه هو أكد لى معلومه قديمه لما سألته هو متصادر؟ قاللى أيوه,اللى اعرفه انه متصادر برضه عشان بيقول للغوله (نفس الغوله)عينك حمرا,قعدت افكر كده جايز اكون سمعت مره حد من بتوع حرية الفكر والحاجات دى بينتقد منع كتاب زى ده,ما افتكرش انى سمعت حاجه زى دى, افتكرت بس ان نزار مره قال فيما معناه يعنى انه فى بلادنا تستطيع انتقاد الله ولا تستطيع انتقاد الحاكم,دلوقتى تستطيع انتقاد الله جل جلاله,والحاكم,بس لا تستطيع ان تقول لسبب الاحتقان الموجود فى مصر عينك حمرا.ه
. . . . كنت ناوى من الأول أدخل (حسن ومرقص) مفيش كوهين بقى ماهو هج من زمان,مالقيتوش غير فى سينما ميامى,الصراحه ما انصحش اى حد يدخل السينما دى أبدا,نظام كل سنه وانت طيب من اول شباك التذاكر لحد الباب لحد الكرسى اللى هتقعد عليه,حاجه فعلا تضايق,معرفش اللى عاوز ياخد فلوس بيقول كل سنه وانت طيب ليه, دخلت الفيلم,رأيى اللى كونته عن عادل امام بيتأكد يوم بعد يوم,ممثل جامد جدا,وشخص حقير جدا,عمر الشريف ممثل جامد جدا,بس ماليش رأى فى شخصه لانه مش عايش هنا ولا عامل كلب السلطه ولا شغلته يهاجم المتدينين زى التانى ده.ه
الفيلم لطيف بغض النظر عن المضمون اللى ممكن نختلف عليه,وده اللى هقوله المره الجايه باذن الله.ه

Jul 16, 2008

لا نامت أعين المعتدلين

مبارك للبنان
ولكل العرب
نحن قوم لا نترك أسرانا فى السجون

Jul 12, 2008

قولى إنك تنتظرين

قد آتيكِ
عند الفجر شـعاع ضياءٍ
يرقص فرحاً لو تصحين
أو عصفوراً
يعزف أحلامى أغنيةً
يتشرب من بحر حنين
قد أتخفى خلف الشمسِ
وأحلم يوماً لو تأتين
فأنا أسكن نور عيونك
وأنا أَمَلُكِ لو ترضـين
لحظة حبٍ لو تجمعنـا
تغفر بعداً دام سـنين
تحيى قلبى أو تجعـله
يقطر فرحاً بعد أنين
قولى أقبـِل
لا تتركنى
قولى إنك تنتظرين

Jul 4, 2008

فاضل ايه فى مصر؟

يا دكتور مسيرى , قلب الوطن مجروح , ولسان حالنا بيقول: ايه اللى فاضل لنا؟ه
.
.
.
على الهامش: نجحت فى الماجستير -الجزء الأول - وجبت جيد جدا بفضل الله

Jun 13, 2008

لو أنى فقط..أتلاشى

النهارده خرجت عشان اعمل مشوارين مهمين جدا بالنسبه لشغلى ودراستى,لقيت السكتين مقفولين ,ما جاليش احباط جامد يعنى,قلت لنفسى ان ده بقى الطبيعى
.
.
. كل يوم بيعدى عليا وانا فى مصر بحس انه بخساره, فكرة الغربه بتسبب لى وجع جامد, بس الواحد خايف بعد كده يندم انه فضل هنا لو ما حققش حاجه فى المستقبل,وخايف كمان ربنا يحاسبنى
.
.
. فى أقل من أسبوعين,اختلفت مع اتنين من اللى أعرفهم, واحد قال لى انت سئ الظن كالعاده,كمان كالعاده, التانى اتهمنى بالتعصب والجمود,هو معقول يكون الناس غلط وانا اللى صح؟ ولاّ أقول زى بهاء طاهر:لست مثل الذين يريدون اعتراف الاخرين بهم, أنا أريد أولاً أن اعترف بنفسى؟
.
.
. حد كان صديقى فى يوم من الأيام,العلاقه فترت بينا وتقريبا ما بقيناش نتكلم,بس لما كنت بلاقيه اونلاين على الماسنجر حتى لو ما اتكلمناش بعرف انه كويس وخلاص,لما غاب فتره طويله كنت بقول لعل السبب خير,لحد ما اكتشفت برنامج بسيط كده بيقولك مين عمل لك بلوك او ديليت ,ابن حلال البرنامج ده الصراحه,عامل زى دش بارد كده
.
.
.
. ريم بنت خالى,عندها سنتين,بنوته زى العسل,باخدها فى حضنى وأقولها بتحبينى يا ريم, قالتلى آه..قد ايه يا ريم؟ قدّ الجنه ,قليلين قوى اللى مش ممكن تشك انهم بيحبوك بجد .
.
.
اليوم قرأت قول نزار:أنا متعبٌ..ودفاترى تعبت معى, هل للدفاتر يا ترى أعصاب؟
.
.
.
العنوان مأخوذ من احدى روايات بهاء طاهر

Jun 4, 2008

هصلى هصلى..مهما حصل لى

اعتداء مسلح على محل للذهب فى حى الزيتون يملكه أقباط

كانت تلك هى صيغة الخبر فى اغلب وسائل الإعلام ,بعد وقوع الحادث بدقائق قليله,لاحظ التركيز على جملة يملكه أقباط(مسيحيون)
أول ما تبادر الى ذهنى وقتها هو تخيل حدوث اعتداء مماثل على محل للذهب فى الزيتون أيضاً يملكه مسلمون(بما انه بات من الطبيعى جدا أن نتكلم عن المواطن المصرى اما باعتباره مسلما او اعتباره مسيحيا) هل كان الخبر سيقال هكذا:اعتداء مسلح على محل للذهب فى حى الزيتون يملكه مسلمون؟
أعتقد ان الاجابه هى لا,والسؤال التالى سيكون ولماذا؟ بمعنى ولماذا أصبحنا مهيئين تلقائياً لاعتبار هذا الاعتداء موجهاً ضد المسيحيين؟ لماذا لم نفكر ولو للحظه انه اعتداء اجرامى قام به بعض اللصوص ضد محل للذهب؟ , وأغلبنا يعرف أن تجارة الذهب من ضمن صناعات اخرى كثيره يكاد يغلب عليها الطابع المسيحى ربما بحكم توريث المهنه, أى أننا لو افترضنا أن عصابات السطو المسلح قامت بعشر عمليات سطو على محال للذهب ربما يتصادف أن يكون أغلبها أو حتى كلها ملكاً لمسيحيين؟
البعض يحاول أن يبدو معتدلاً ولا يصرح باعتقاده أن الاعتداء موجه ضد المسيحيين ويكتفى بالقول لننتظر التحقيقات قبل أن نطلق أحكاما جزافيه,وفى رأيى أن مجرد وجود تلك الفكره فى العقل الجمعى المصرى يعتبر كارثه بكل المقاييس, فكرة أن المسيحيين لا يمكن أبداً أن يكونوا طرفاً فى أى نزاع, او ضحايا لعمليات ارهابيه أو اجراميه, ولا أعرف لماذا,ألا يبلغ عدد المسيحيين فى مصر حوالى ستة ملايين وربما يزيدون؟ ألا يتواجدون فى كافة مدن مصر ويعيشون كمواطنين عاديين لا تضمهم أحياء منفصله خاصه بهم؟ ألا يجعل ذلك كونهم طرفاً فى المشاكل الحياتيه أيا كانت بشاعتها امراً متوقعا كونهم مواطنين يعيشون بتلك الدوله كغيرهم من سكانها؟ ألا يمكن ان يتبين بعد ذلك أن الجناه مسيحييون أيضاً(بالصدفه يعنى), ألا تذكرون معى مذبحة بنى مزار بالمنيا, كان الضحايا كلهم من المسلمين فاعتبرت جريمه قتل عاديه(وهى كذلك فعلا) تخيلوا معى لو كان الضحايا مسيحيين,ولم تتوصل الشرطه للجناه الحقيقيين كما حدث فعلاً,بالتأكيد لم يكن الأمر ليخلو من تلميحات بالطائفيه, واتهامات للشرطه بالتهاون مع الجناه كما أشيع فى حادثة الدير ونشرته المصرى اليوم فى تغطيتها للحادث , وكنا سندخل فى دائره مفرغه من التعصب الكريه نحن فى غنى عنها.
لماذا يعانى المسيحيون من تلك الحساسيه المفرطه؟ من المسئول الأول عن حالة الاحتقان التى تسود الآن؟فى الواقع لدىّ إجابه على السؤال الخير أفضل الاحتفاظ بها لنفسى, لماذا لا نتذكر أن أرشيف المحاكم يحتوى ملايين القضايا التى يختصم وربما يقتل فيها مسلمٌ مسلما آخر, او مسيحى يقتل مسيحياً آخر,لماذا سيطرت علينا فكرة أن المسيحى لن يكون ضحيه لأى اعتداء الا بسبب كونه مسيحياً؟
فى سياق تغطيتها لحادث الزيتون,تشير الصحف باستمرار إلى أن الكنيسه ستصبر ولن تتعجل الحكم على الحادث,وأن البابا يتابع الحادث من أمريكا,يعلنون ذلك من باب الحكمه أو التروى, وأنا أرى أصلا أن مجرد دخول الكنيسه طرفاً فى هذه الحوادث يعد أمراً خطيراً جدا,ما دخل الكنيسه بحادث سرقه حتى وان كان الضحيه مسيحيا؟ هل الكنيسه جهه قضائيه؟ هل هى مخوله قضائيا أو دستوريا بالتحدث باسم المسيحيين؟,هل الكنيسه دوله داخل الدوله, أم هى سفاره مهتمه بمصالح رعاياها وحقوقهم؟ان كانت كذلك فلتعلن ذلك رسمياً حتى تصير الأمور أوضح.
(هصلى هصلى..مهما حصلى..,سنقف فى وجه الارهاب ) شعاران من ضمن ما رفعه المتظاهرون فى الدير بالمنيا بعد الحادث الأخير
البعض استنكر على استحياء تلك المظاهرات وحاول ايجاد العذر لهؤلاء باعتبارهم غاضبين, وأنا لا أراهم الا مجموعه من لغوغاء, وان أردت التسامح أكثر سأصفهم بالحمقى والمغرر بهم, ما دخل نزاع على أرض لا يملكها أى من الطرفين بصلاة المسيحيين؟ ان كان الدير يملك ما يثبت ملكيته للأرض فلماذا لم يرفع دعوى قضائيه لاثبات حقه مع أن الأمر قديم والنزاع متجدد؟
وان كان الفلاحون يملكون وثائق تثبت ملكيتهم للأرض فلماذا لم يقوموا بذلك؟ الأمر فى رأيى يمكن ان نلخصه بجمله واحده(غيبة القانون وتراخى هيبة الدوله) لا علاقة له بصلاة المسيحيين حتى يصرخوا هصلى هصلى مهما حصلى, ومن منعك من الصلاة أيها الغاضب المضطهد؟هل قام الفلاحون(المسلمون او العرب كما تصفهم المواقع المسيحيه على النت) بما قاموا به بنية منع المسيحيين من الصلاه فى الدير أم بنية استرجاع الأرض كى يزرعوها؟ ان كانوا مخطئين فسيحكم القضاء بذلك, وسيعلن القضاء أيضا عن قاتل الفلاح(المسلم) وفى جواز حمل الرهبان للأسلحه فى مكان يفترض انه للعباده.

May 21, 2008

قالت ضحى

مقاطع من رواية بهاء طاهر العذبه..قالت ضحى

لا يضيع الدنيا الذين مع أو الذين ضد , ولكن يضيعها المتفرجون
لا تتباه بهمومك
آلاف من الناس يصفعون كل يوم , ولكن قليلاً منهم من يشعر بالإهانه أو الغضب , قليل منهم من يصيبهم مرض العدل
قالت وهى ترفع إلىَّ عينيها الواسعتين : - هل أغضبتك حقاً ؟ - نعم - كثيراً جداً ؟ - نعم - تقدمت منى حتى أوشكت أن تلامسنى وكان وجهها شديد الشحوب ثم قالت : - إذن فما أقل حبك , ما الحب إن كنت لا تستطيع أن تحمينى من نفسى ؟
هذه الدنيا نغم ٌ لا عراك , عشقٌ لا تمرد , فسلم ... لا تفكر
لا ألومك إن لم تعرفنى , فليست لدىَّ علامه !!!
- وماذا تقصد أنت بالشر ؟ -
قلت لم أفكر فى هذا قبل الآن , ولكن أظن أننى طول عمرى أكره القهر , قهر الإنسان بالفقر , وقهره بالخوف , وأهم من ذلك قهره بالجهل , أن يعيش الإنسان ويموت دون أن يعرف أن بالدنيا علماً فاته , وجمالاً فاته , وحياةً لم يعشها أبداً
حين تخون واحداً فأنت تخون العالم كله , عندما خنت صديقك فقد خنت أيضاً احلامك وأفكارك , لم يعد ممكناً أن تعود نفس الشخص
قد لا ينقذ من يطلب العدل العالم , وقد لا يقضى على الحيه , ولكنه ينقذ نفسه
أعرف أن طلب العدل مرض , ولكنه المرض الوحيد الذى لا يصيب الحيوانات
عندما تقرر الإنتحار تكون وقتها قد مت بالفعل , ما ينقذونه بعد ذلك لا يكون هو أنت , ولكن جثتك
اكتشفت عالماً هائلاً كان غائباً عنى , عالما ً من اللاشئ
جربت من قبل فى حياتى خيبة الأمل فى الحب , أحببت فتاة ً لم تبادلنى الحب , وعرفت آخرين تعثرت علاقتى بهم فى منتصف الطريق , وعرفت ذلك الألم , أن يشعر الإنسان أنه مرفوض ٌ ومهان وضئيل أمام نفسه , ولكنه لا يملك إلا أن يحب سبب ذلك كله , لا يملك إلا أن يراوده الأمل فى أنه ربما بطريقة ٍ ما , بمعجزة ٍ ما , ستورق من جديد تلك الشجرة التى سقطت فى الأرض وماتت , ستصل رسالة ما , مكالمة ما , سيلقى الوجه الذى هجره فجأه فى الطريق فتبتسم العيون وتتعانق الأيدى , ويرجع كل شئ , ستتحقق فى الصباح احلام الليل , ولكن مع الزمن , وإذ تظل الأحلام أحلاما ً, لا أقول أن الجرح يشفى , ولكننى كنت اتعلم كيف أعيش مع تلك الحربه المرشوقه فى داخلى كأنها جزء منى , إلى أن يأتى حب جديد , وألم جديد
اكتشفت أن الظلم لا يبيد .. ما الحل ؟ أن تحدث ثورة على الظلم ؟ نعم تحدث تلك الثوره , يغضب الناس فيقودهم ثوار يعدون الناس بالعدل وبالعصر الذهبى , ويقطعون رأس الحيه , ولكن جسم الحيه على عكس الشائع لا يموت , يظل هناك تحت الأرض , يتخفى , يلد عشرين رأسا ً بدل الرأس الذى ضاع , ثم يطلع من جديد واحد من هذه الرؤوس اسمه حماية الثوره من أعدائها , وهو لا يقضى بالضبط إلا على أصدقاء الثوره , ورأس آخر اسمه الاستقرار , وباسم الاستقرار يجب أن يعود كل شئ كما كان قبل الثوره نفسها, ورأس آخر اسمه الضرورة المرحليه , الظلم المؤقت إلى حين تحقيق رسالة الثوره , وفى هذه الظروف يصبح لطالب العدل اسم جديد , يصبح يساريا ً, أو يمينيا ً, أو عدوا ً للشعب , حسب الظروف .

May 15, 2008

سنرجع يوماً

Apr 9, 2008

سيبقى خفاقاً..بنجومه الثلاث

رساله من أطفال العراق00إلينا
غوصوا بِوحلِ الصمتِ فى أوطانِنِا
فالصمتُ فرضٌ00
والطريقُ مُمَهَّد
ُ
مـاذا سـَـيَجرِى إِن يَمـُـوتُ عِرَاقُنـَـا
فالقد سُ ضاعت قبلَه والمسـجدُ
مـاذا سيـجرى حيـن يَنهَـشُ لحمَنــَـا
ذِئـــبٌ حقِــيرٌ
بِالبِـــلاد يُعَربدُ
مـاذا صـنعتـم والدمــارُ يَحُـوطُنـَـــا
وجمـــوعُ شَــــرٍّ ضِـَّدنَـا تَتـَـوَحــَّــدُ
منــكم ضعيفٌ
خـانَ وِحـدَة دِيِننَـــــا
منــــكم ذليـــلٌ بِالهـَـــــوَانِ مُقَيــَّــــدُ
قل لِى بِربِّ البَــيـتِ يَـامَـن بِعـتَنـَـــا
أَتَخـاف ربَّكَ؟
أم تُـرى مـن تَعـبُُدُ؟
أتـنــامُ عينـُـكَ؟
أم تُراكَ حَسِــبتَنَــــا
أصــنامَ مِن طُــولِ البـَـلاَءِ
تَعـَـوَّدُوا
أَنَسِـــيتَ أَنـَّا فى المهـانـَةِ واحـِــــدٌ؟
أَنَسـِـيتَ طِفـلاً قـد جَفــَاهُ المَـرقـَــدُ؟
لا تَيأَسُوا
يَا كُلَّ من يَدعُوا لَنَا
فصَـلاحُنـَا رغــم المهـانــةِ عائــِـــدُ
سَـيَهُبُّ من تحـت الرمــادِ مُزمجِـرا
من قلـــبِ طفــلٍ
أوعَجـُـوزٍ تَســـجُدُ
لِيُعِــيدَ حِطِّيـنَ العُروبــَـةِ مِـن هُنـَـــا
  1. فَالحَـقُ دومــاً فى النهــايـــةِ سـَـــيِّـدُِ

Apr 8, 2008

يقين

بإيمانى
أعيش العام
تلو العام00
نفس الحلم00لا أنسى
يقينٌ لا يفارقنى
وقلبٌ تاق للمرسى
نقاء الروح يدفعنى
وشوقى للعلا زادى
حنينٌ أن يعود النور
ملء النهر والوادى
يزيد القلب إصراراً
ليعدو
نحو ميلادى
وأحلامٌ بطىِّ القلب
باتت غير محبوسه
تخايلنى
برغم البعد
كالأزهار ملموسه
تعطِّر كل أرجائى
كما الريحان والعنبر
فلن تمضى سوى لحظه00
تليها ومضةٌ أقصر
ليخرج بالفلا نبتٌ
بصبر العمرقد أثمر
يقيناً حينها أقهر
قيود وسطوة السجان00
أقتل فى الحشا
خوفى
أغالب قسوة الحرمان
أشهر فى المدى
سيفى
لأقطع دابر الأحزان
أسقط راية
الزيف

Apr 3, 2008

بمناسبة بهاء طاهر

عنوان لافت جداً, ومعبر جداً, اختاره القائمون على احتفالية نقابة الصحفيين ببهاء طاهر بمناسبة فوزه بجائزة بوكر
العالميه فى نسختها العربيه الأولى
. مناسب جدا لأن وجود بهاء طاهر فى حد ذاته مناسبه تستحق الاحتفال, ولم لا ووجوده-وقليلون مثله- من الأشياء القليله التى تجعل الحياه محتمله,بل وأجمل كثيراً
. عرفت أدب بهاء طاهر العام الماضى فقط عندما صدرت واحة الغروب,وفى شهرين تقريباً كنت قد قرأت كل ما كتب, من بالأمس حلمت بك..إلى شرق النخيل..مرورا بأنا الملك جئت( التى تتشابه بنسبه كبيره مع السيميائى لباولو كويليو مع العلم بأنها صدرت قبل السيميائى, والتشابه يغريك بالمقارنه دائما,وستكتشف ببساطه أن بهاء أكثر ابداعاً وعذوبه من كويليو.) ووصولاً إلى الحب فى المنفى وقالت ضحى وهما من أجمل ما قرأت فى كل المجالات وليس الروايه فقط, وفى رأيى أنه لو لم يكتب بهاء طاهر غيرهما لكفى ذلك لجعله كاتباً عظيماً
. يعود الفضل فى معرفتى بأدب بهاء طاهر الى بلال فضل عندما أفرد صفحه كامله فى الدستور عن واحة الغروب وقت صدورها مما أغرانى بقرائتها,بلال فضل الذى تحدث فى الاحتفاليه عن اعتقاد الناس بأن اسم الكاتب يساهم فى نجاحه بغض النظر عن مستوى ما يكتبه وضرب مثلا بنجيب محفوظ على اعتبار انه كان نجيبا محفوظاً, والبهاء الطاهر أيضا,ويرد بلال على ذلك بأسلوبه الساخر بأن واحة الغروب لو صدرت بتوقيع وحشى بن حرب ستنجح نفس النجاح,ولأن الشئ بالشئ يذكر,يقول العرب أن لكل منا من اسمه نصيب, وفى رأيى أن بهاء طاهر أخد من اسمه نصيبه كاملا.

فى كلمته , أخبرنا بلال فضل أن الرئيس مبارك قرر تكريم الأستاذ بهاء واطلاق اسمه على أحد الميادين كما قرر إلغاء الحبس بحق ابراهيم عيسى الذى كان يدير الندوه,بالطبع كانت تلك هى كذبة أبريل, وبغض النظر عن التكريم الرسمى الغائب للرجل,يكفى أنه سيأتى يوم على مصر يكون مقرراً على طلاب المدارس سؤال من نوعية: اذكر اسم حاكم مصر فى الفتره التى عاش فيها بهاء طاهر, والغالب أن أحدا لن يعرف الإجابه
. بهاء طاهر نفسه يقول على لسان بطل الحب فى المنفى: لست مثل الذين يريدون اعتراف الاخرين بهم ,فليذهب الآخرون الى الجحيم ,أنا أريد أولا أن اعترف بنفسى
. لست ممن يغرمون بالمشاهير أبدا لمجرد كونهم كذلك , ولكنى ذهبت هذه المره فقط لكى أرى هذا الرجل بعد أن أعجبت بشخصيته قبل أدبه,بالفعل لم يخيب ظنى وأكد لى صورته التى رسمتها فى خيالى, عندما قدمت له نفسى وهنأته بالجائزه سلم على كما لو كنا صديقين قديمين, وبحميميه صادقه جدا, وطيبه وتواضع لا يوصف, وجه مصرى منحوت يشع بالطيبه, وجسد نحيل أكثر مما يبدو فى التليفزيون,باختصار هو من ريحة مصر التى أعرفها وأحبها
. ان أعرف بهاء طاهر متأخراً,خير من ألا أعرفه أبدا, هذا ما قلته لنفسى,حيث أنى كنت سأحزن جدا ان لم أقابل هذا الرجل برغم وجودى معه فى زمن واحد.

Feb 20, 2008

صباح الحنين

صباحٌ يتوق إلى مقلتيكِ
ويحلم يوماً أن ترجعى
صباح الحنين إلى ما حلمنا
بفرح القلوب وبالأدمعِ
برغم البعاد تضمين روحى
ويرتاح قلبك فى أضلعى
بكل الليالى تطوفين حولى
وركب الحنين بقلبى يفوت
حرامٌ لقانا إذا ما أردنا
وهمس الحنايا طواه السكوت
بهذى البلاد تموت الأمانى
سلامٌ على كل حلمٍ يموت
فراقٌ يكلل كل الحكايا
وشوقٌ يرفرف فوق البيوت
حزينٌ هوانا كزهرٍ شريدٍ
فلا أرض عندى لكى أزرعه
هو الحب يهجر هذى الديار
وشمس القلوب توارت معه
بليلٍ طويلٍ يموت اغتراباً
وبرد المدائن قد أوجعه
إذا لم نعِشه كحلمٍ برئٍ
فشوق المحبين لن يرجعه
دموعٌ تغطى وجوه المرايا
فلا فرح يخفى ولا أقنعه
لإن يكفر القلب بالأمنيات
وبالأرض يوماً لن أمنعه
إذا عاد وطنى فلا أشتهيه
إذا قال عُد لى فلن أسمعه

Feb 16, 2008

بلا ذاكره

فى فيلم المدينه,يتناول المخرج(يسرى نصر الله)قصة شاب يعيش فى حى شعبى ممضياً وقته بين أصدقائه وحبيبته,يسافر الشاب الى فرنسا ويتعرض لحادث يفقد على اثره ذاكرته بشكل كامل ثم يعود بشكل ما إلى مصر مرة أخرى.

حين يعود الى الحى يلتقى بحبيبته التى لا يذكرها,فيحبها مرة أخرى,ولم لا فذاكرة القلب عصية على الفقد.

ما يشدنى هنا هو علاقته بأحد أقرب أصدقائه أو من كان يعتبره كذلك,حين يتعامل معه بذاكرة بيضاء يصل ليقين كامل باستحالة كون هذا صديقه,كيف وهو لا يتفق معه فى أى شئ,ويسخر من مشاعره بل ويحقد عليه أيضا,كل الحكاية أن مكانا واحداً قد جمعهم,لا أكثر ولا أقل.

أمن الضرورى أن أفقد ذاكرتى كى أصل لما وصل إليه بطل الفيلم؟ آهٍ لو كنت بلا ذاكره!!

لن أنتظر هذا الحادث والذى ربما لن يحدث أبداً,سأفعل كما فعل هذا الذى بلا ذاكره,سأنظر للمحيطين بى وكأنى ألقاهم لأول مره,سأقيِّم علاقتى من جديد بكل من حولى,أسهل كثيرا من التفكير لم ابتعد هذا,ولم تغير ذاك, هو التسليم بأن هذا ليس صديقاً غدر,هو ليس صديقا فحسب.

لا يعنى هذا أننى سأعيش وحدى,فقط سأعيد ترتيب الأمور,وليحتل كل انسان المكان اللائق به.

الحق أنى مدين لنفسى باعتذارات كثيره,عن أوجاع كثيره ,كان من المكن تفاديها بقليل من التفكير,فمن لا يجد وقتا ليسأل عنك, من باب أولى لا يجد وقتا ليفكر فيك,فضلا عن أن يحبك.

وهذا لا يستحق بالتأكيد ان تسعده بعتابك,فالعتاب من الحب.

فى الخلفيه:فريد الأطرش(اتقل اتقل ع اللى بيتقل وما تسألش عليه,وابعد واسأل ع اللى بيسأل ليه تتحير ليه)

Feb 10, 2008

لم تعد الدنيا تتسع للشرفاء

أخشى أن تكون تلك حقيقه فعلا
مصر كانت تحتاجك أكثر
لا اعتراض على قضاء الله
ستعيش طويلا يا أخى
انا لله وانا اليه راجعون

Feb 1, 2008

من حقنا نحلم...ولو كده وكده

أن يقدم أحدهم إلى هديه,فهذا حدثٌ نادر ُلو تعلمون,ولكنه حصل فعلا أيها الأخوه المواطنون, صديقه عزيزه أهدتنى سى دى عليه مجموعه من الأغانى للشيخ إمام , أحمد منيب, و الألبوم الأخير لوجيه عزيز.
معرفتى بوجيه عزيز لم تكن تتعدى مجرد سماعى باسمه أحياناً , حتى استضافته قطعة السكر الشهيره بمنى الشاذلى قبل نحو عام , ليلتها دهشت جدا للحاله التى كنت فيها وانا استمع اليه ,كنت مبسوط جدا,جايز حظه انه جه وانا عندى استعداد او نفسى أفرح مثلا, مش عارف, بداية لا أعتقد أن وجيه يعد من بين الأصوات الجميله أو على الأقل هو ليس من أجمل الأصوات , هو فى رأيى حاله متكامله ,حاله مصريه خالصه , جميله , متفرده , احساسه العالى يسبق صوته بكثير , وكونه صاحب مشروع فنى يجعلنى احترمه كثيرا , يتجاوز وجيه أغانى الحب والهجر التى زادت عن الحد حتى أساءت للحب نفسه , وزيفت مشاعر أعتبرها أرقى كثيرا مما تبدو فى كلمات من يغنون الآن.
فى ألبومه الأخير ( ناقص حته) يتعامل مع الشاعر على سلامه فى كل الأغانى باستثناء أغنيه واحده لمجدى نجيب, والألحان كلها لوجيه , وللتعريف بوجيه الملحن(اللى يقدر يلحن الجرنان على رأى واحد صاحبى ماتعرفوهوش) يكفى أن تعرف انه ملحن أغانى ممكن وإيديا فى جيوبى ومن أول لمسه لمنير.
وجيه, كمنير وعلى الحجار , يشعرنى أنه يغنى لى وحدى , وأحيانا كثيره يطبطب علىّ ,وهل هناك أجمل ممن يحاول اخبارك ان من حقنا نحلم ولو كده وكده؟
انا مثلا مقتنع تماما ان كل حياتنا كده وكده , يعنى بلدنا دى وكأنها بلدنا, واحنا وكأننا عايشين فيها, بنروح الشغل ونعمل اننا بنشتغل , وهما بيعملوا انهم بيدونا فلوس, الحاجه الوحيده الحقيقيه فى حياتنا هى الحزن , طيب ليه بقى ما نجربش نحلم ونفرح..ولو كده وكده؟
اناهجرب. بس على الله لما اجى افرح,ألاقى فاضل ف القلب حته .
على سلامه هو الآخر فى نظرى ليس من أعظم الشعراء, لكنه صادق جدا,وحقيقى لأقصى حد , ومع ايمانى بأن الأغنيه لابد وأن تُسمع لكى يصلك احساسها ,سأنقل هنا بعض الكلمات من (ناقص حته) للعزيز وجيه.
من حقنا نحلم
ولو كده وكده
ونشوف الدنيا حلوه
مع انها مش كده
من حقنا نحلم
نحلم بس وخلاص
ونقوم الصبح عادى
نقابل نفس الناس
من حقنا نحلم
نحلم حتى فى سكات
ونشوف حاجات حاجات
مثلا الناس سعيده
وشاطره مش بليده
وقريبه وبعيده
بتحضن بعضها
مثلا مفيش جراح
والخنقه بقت براح
وانا لو تعبت ارتاح
فى حضن قلبها
مثلاً الكون جميل
والنيل بقى الف نيل
وطن مالوش مثيل
ف الدنيا كلها
من حقنا نحلم
ولو كده وكده

Jan 18, 2008

قلب الوطن مجروح..لايحتمل أكتر

العيشه مره لكن ..أهى أحسن من مفيش

****** أغنية التتر لفيلم حين ميسره
بمر بحالة ملل بقالى فتره طويله,رغم وجود اللى يشغلنى زى شغلى وزى دراستى فى الماجستير,بس انا عندى احساس مش قادر أقاومه وهو إنى مش عايش..ع الأقل زى مانا عايز,يعنى ما بعملش حاجه تقريبا من اللى بحبها,وكمان بعمل حاجات كتير مبحبهاش ,بس ما باليد حيله,حتى اصحابى تقريبا فشلت كل المحاولات اننا نتجمع مع بعض مره ولو ساعه حتى,لظروف بقى مختلفه خاصه بكل واحد . المهم قررت فجاه كده من يومين انى أخرج, بس هروح فين؟ افتكرت انى بقالى كتير ما رحتش سينما,وفيه كم فيلم كويسين بيتعرضوا دلوقتى,قررت اشوف فيلم الجزيره لانى قبل ما أخرج كنت بقرأ نقد كويس عنه لأحمد صالح فى الاخبار,نزلت وسط البلد ولقيتنى عند سينما مترو بس ما بيعرضوش فيلم الجزيره,قمت بعد تفكير شويه دخلت حين ميسره لخالد يوسف زى مامكتوب على الأفيش(الاسم الوحيد ع الافيش هو اسم المخرج)
الفيلم مدته ساعتين وتلت تقريبا ,للأمانه محستش بالوقت خالص, واستمتعت جدا بغض النظر عن رأيى فى محتوى الفيلم اللى هبقى أقوله بعدين,بس قعدت ساعتين لوحدى حتى لو حواليا حوالى 500 واحد, بس محدش منهم يعرفنى,بتفرج على الفيلم بطريقتى,بشوف زاوية التصوير ازاى ,وحركة الكاميرا, والاضاءه,وتعبيرات الوشوش,وتقطيع المشاهد وترتيبها, بشوف مصر الأخرى اللى يمكن ناس كتير ميعرفوش انها موجوده, مصر المسحوقه,المنداسه,المغتصبه ,المهانه,ال.... كتير أوى
. اكتشفت ممثل عملاق وكأنى بشوفه لأول مره اسمه عمرو عبد الجليل اللى كأنه اتولد من جديد,قدم دور عمره,ضحكنا كلنا فى عز الغم اللى فى الفيلم,ضحكنا على الهم نفسه
ووجعنا أوى وهو بيقول لعمرو سعد :هو احنا للدرجه دى مش باينين ولا مش موجودين أصلا؟ فكرنى بكلام سيد حجاب(أقسى همومنا تفجر السخريه,وأصفى ضحكه تتوه ف بحر الدموع) وهاله فاخر, وعمرو سعد ,واحمد بدير كلهم كانوا فوق العاده دخلت الفيلم وانا مبحبش خالد يوسف, وعجبنى الفيلم , وخرجت برضه وانا مبحبش خالد يوسف مع اعترافى بحرفيته الشديده,بس ده هبقى اتكلم عنه مره تانيه
كمان الفيلم كان فيه شوية أغانى روعه من لون فؤاد حداد ووجيه عزيز بس للأسف نسيت اسم المطرب اللى هو كمان الشاعر لأنه مش مشهور. بعد الفيلم اتمشيت من طلعت حرب لحد كوبرى قصر النيل, الجو كان تلج, بس وقفت برضه ف نص الكوبرى شويه أبص للنيل وللناس اللى بيلعبوا حب على رأى محمود عزت,وبعدين كملت لحد الاوبرا ووقفت عند الراجل بتاع الكتب اللى هناك, قلبت فى كتب عمر طاهر (شكلها باظت وكابتن مصر), و(قلمين) لبلال فضل,بس اشتريت كتاب تانى خالص,من اجمل ما قرأت فى حياتى ,كتاب اسمه( تاكسى ..حواديت المشاوير) لخالد الخميسى,خلصته فى يوم ونص , ما يبعدش كتير محتوى الكتاب عن اللى شفته فى السينما,البطل واحد هنا وهنا,الناس اللى وقت الشده بيسدُّوا ووقت الفرح منسيين زى ما بتقول اغنية تتر النهايه فى الفيلم
وأناراجع تانى ناحية التحرير قابلت واحد حسيت انى اعرفه وبعد ما فات بمسافه كبيره رجعت وراه بسرعه وقلتله هو انت هانى جورج؟انا ما شفتش هانى غير فى الصور وده شبهه جدا,قلت ياريت يطلع هو عشان اتكلم معاه شويه, بس قاللى لأ,اعتذرت له وكملت مشى
انا هبقى اقول رأيى فى حين ميسره وكتاب تاكسى حين ميسره ان شاء الله. النهارده سمعت لأول مره اغنيه لمنير عندى بقالها كتير أوى ومسمعتهاش غير دلوقتى
قلب الوطن مجروح
لا يحتمل اكتر
نهرب وفين هنروح
لما الهموم تكتر
نحمى غصون الورد
من دمع سال ع الخد
آه يا حبيبة الروح
قلب الوطن مجروح
لو حتى قلبى تاه
بين الشجن والآه
ياللى لقاكى حياه
أنا حبى ليكى صلاه
يا مطيّره العصافير
رجع الهوا بالخير
لو قلبى عاد ضميه
اديه حنان وداديه
دا الصمت مش لينا
فين الولد ما يروح
لازم يعود أسمر
قلب الوطن مجروح
لا يحتمل أكتر
لو تنطقى الموال
لازم يروق الحال
محتاجه ليا دراع
وشراع وراحة بال
محتاج ليكى نجوم
هايمه ف حضن هلال
لو بحرى نام اسقيه
صحيه وبوسى عنيه
ياما بكره يسقينا
خليه طريق البوح
يصبح طريق مرمر
قلب الوطن مجروح
لا يحتمل أكتر