من حقنا نحلم...ولو كده وكده

أن يقدم أحدهم إلى هديه,فهذا حدثٌ نادر ُلو تعلمون,ولكنه حصل فعلا أيها الأخوه المواطنون, صديقه عزيزه أهدتنى سى دى عليه مجموعه من الأغانى للشيخ إمام , أحمد منيب, و الألبوم الأخير لوجيه عزيز.

معرفتى بوجيه عزيز لم تكن تتعدى مجرد سماعى باسمه أحياناً , حتى استضافته قطعة السكر الشهيره بمنى الشاذلى قبل نحو عام , ليلتها دهشت جدا للحاله التى كنت فيها وانا استمع اليه ,كنت مبسوط جدا,جايز حظه انه جه وانا عندى استعداد او نفسى أفرح مثلا, مش عارف, بداية لا أعتقد أن وجيه يعد من بين الأصوات الجميله أو على الأقل هو ليس من أجمل الأصوات , هو فى رأيى حاله متكامله ,حاله مصريه خالصه , جميله , متفرده , احساسه العالى يسبق صوته بكثير , وكونه صاحب مشروع فنى يجعلنى احترمه كثيرا , يتجاوز وجيه أغانى الحب والهجر التى زادت عن الحد حتى أساءت للحب نفسه , وزيفت مشاعر أعتبرها أرقى كثيرا مما تبدو فى كلمات من يغنون الآن.

فى ألبومه الأخير ( ناقص حته) يتعامل مع الشاعر على سلامه فى كل الأغانى باستثناء أغنيه واحده لمجدى نجيب, والألحان كلها لوجيه , وللتعريف بوجيه الملحن(اللى يقدر يلحن الجرنان على رأى واحد صاحبى ماتعرفوهوش) يكفى أن تعرف انه ملحن أغانى ممكن وإيديا فى جيوبى ومن أول لمسه لمنير.

وجيه, كمنير وعلى الحجار , يشعرنى أنه يغنى لى وحدى , وأحيانا كثيره يطبطب علىّ ,وهل هناك أجمل ممن يحاول اخبارك ان من حقنا نحلم ولو كده وكده؟

انا مثلا مقتنع تماما ان كل حياتنا كده وكده , يعنى بلدنا دى وكأنها بلدنا, واحنا وكأننا عايشين فيها, بنروح الشغل ونعمل اننا بنشتغل , وهما بيعملوا انهم بيدونا فلوس, الحاجه الوحيده الحقيقيه فى حياتنا هى الحزن , طيب ليه بقى ما نجربش نحلم ونفرح..ولو كده وكده؟

اناهجرب. بس على الله لما اجى افرح,ألاقى فاضل ف القلب حته .

على سلامه هو الآخر فى نظرى ليس من أعظم الشعراء, لكنه صادق جدا,وحقيقى لأقصى حد , ومع ايمانى بأن الأغنيه لابد وأن تُسمع لكى يصلك احساسها ,سأنقل هنا بعض الكلمات من (ناقص حته) للعزيز وجيه.

من حقنا نحلم

ولو كده وكده

ونشوف الدنيا حلوه

مع انها مش كده

من حقنا نحلم

نحلم بس وخلاص

ونقوم الصبح عادى

نقابل نفس الناس

من حقنا نحلم

نحلم حتى فى سكات

ونشوف حاجات حاجات

مثلا الناس سعيده

وشاطره مش بليده

وقريبه وبعيده

بتحضن بعضها

مثلا مفيش جراح

والخنقه بقت براح

وانا لو تعبت ارتاح

فى حضن قلبها

مثلاً الكون جميل

والنيل بقى الف نيل

وطن مالوش مثيل

ف الدنيا كلها

من حقنا نحلم

ولو كده وكده

قلب الوطن مجروح..لايحتمل أكتر

العيشه مره لكن ..أهى أحسن من مفيش

****** أغنية التتر لفيلم حين ميسره

بمر بحالة ملل بقالى فتره طويله,رغم وجود اللى يشغلنى زى شغلى وزى دراستى فى الماجستير,بس انا عندى احساس مش قادر أقاومه وهو إنى مش عايش..ع الأقل زى مانا عايز,يعنى ما بعملش حاجه تقريبا من اللى بحبها,وكمان بعمل حاجات كتير مبحبهاش ,بس ما باليد حيله,حتى اصحابى تقريبا فشلت كل المحاولات اننا نتجمع مع بعض مره ولو ساعه حتى,لظروف بقى مختلفه خاصه بكل واحد . المهم قررت فجاه كده من يومين انى أخرج, بس هروح فين؟ افتكرت انى بقالى كتير ما رحتش سينما,وفيه كم فيلم كويسين بيتعرضوا دلوقتى,قررت اشوف فيلم الجزيره لانى قبل ما أخرج كنت بقرأ نقد كويس عنه لأحمد صالح فى الاخبار,نزلت وسط البلد ولقيتنى عند سينما مترو بس ما بيعرضوش فيلم الجزيره,قمت بعد تفكير شويه دخلت حين ميسره لخالد يوسف زى مامكتوب على الأفيش(الاسم الوحيد ع الافيش هو اسم المخرج)

الفيلم مدته ساعتين وتلت تقريبا ,للأمانه محستش بالوقت خالص, واستمتعت جدا بغض النظر عن رأيى فى محتوى الفيلم اللى هبقى أقوله بعدين,بس قعدت ساعتين لوحدى حتى لو حواليا حوالى 500 واحد, بس محدش منهم يعرفنى,بتفرج على الفيلم بطريقتى,بشوف زاوية التصوير ازاى ,وحركة الكاميرا, والاضاءه,وتعبيرات الوشوش,وتقطيع المشاهد وترتيبها, بشوف مصر الأخرى اللى يمكن ناس كتير ميعرفوش انها موجوده, مصر المسحوقه,المنداسه,المغتصبه ,المهانه,ال.... كتير أوى

. اكتشفت ممثل عملاق وكأنى بشوفه لأول مره اسمه عمرو عبد الجليل اللى كأنه اتولد من جديد,قدم دور عمره,ضحكنا كلنا فى عز الغم اللى فى الفيلم,ضحكنا على الهم نفسه

ووجعنا أوى وهو بيقول لعمرو سعد :هو احنا للدرجه دى مش باينين ولا مش موجودين أصلا؟ فكرنى بكلام سيد حجاب(أقسى همومنا تفجر السخريه,وأصفى ضحكه تتوه ف بحر الدموع) وهاله فاخر, وعمرو سعد ,واحمد بدير كلهم كانوا فوق العاده دخلت الفيلم وانا مبحبش خالد يوسف, وعجبنى الفيلم , وخرجت برضه وانا مبحبش خالد يوسف مع اعترافى بحرفيته الشديده,بس ده هبقى اتكلم عنه مره تانيه

كمان الفيلم كان فيه شوية أغانى روعه من لون فؤاد حداد ووجيه عزيز بس للأسف نسيت اسم المطرب اللى هو كمان الشاعر لأنه مش مشهور. بعد الفيلم اتمشيت من طلعت حرب لحد كوبرى قصر النيل, الجو كان تلج, بس وقفت برضه ف نص الكوبرى شويه أبص للنيل وللناس اللى بيلعبوا حب على رأى محمود عزت,وبعدين كملت لحد الاوبرا ووقفت عند الراجل بتاع الكتب اللى هناك, قلبت فى كتب عمر طاهر (شكلها باظت وكابتن مصر), و(قلمين) لبلال فضل,بس اشتريت كتاب تانى خالص,من اجمل ما قرأت فى حياتى ,كتاب اسمه( تاكسى ..حواديت المشاوير) لخالد الخميسى,خلصته فى يوم ونص , ما يبعدش كتير محتوى الكتاب عن اللى شفته فى السينما,البطل واحد هنا وهنا,الناس اللى وقت الشده بيسدُّوا ووقت الفرح منسيين زى ما بتقول اغنية تتر النهايه فى الفيلم

وأناراجع تانى ناحية التحرير قابلت واحد حسيت انى اعرفه وبعد ما فات بمسافه كبيره رجعت وراه بسرعه وقلتله هو انت هانى جورج؟انا ما شفتش هانى غير فى الصور وده شبهه جدا,قلت ياريت يطلع هو عشان اتكلم معاه شويه, بس قاللى لأ,اعتذرت له وكملت مشى

انا هبقى اقول رأيى فى حين ميسره وكتاب تاكسى حين ميسره ان شاء الله. النهارده سمعت لأول مره اغنيه لمنير عندى بقالها كتير أوى ومسمعتهاش غير دلوقتى

اسمعها اسمها قلب الوطن مجروح

قلب الوطن مجروح

لا يحتمل اكتر

نهرب وفين هنروح

لما الهموم تكتر

نحمى غصون الورد

من دمع سال ع الخد

آه يا حبيبة الروح

قلب الوطن مجروح

لو حتى قلبى تاه

بين الشجن والآه

ياللى لقاكى حياه

أنا حبى ليكى صلاه

يا مطيّره العصافير

رجع الهوا بالخير

لو قلبى عاد ضميه

اديه حنان وداديه

دا الصمت مش لينا

فين الولد ما يروح

لازم يعود أسمر

قلب الوطن مجروح

لا يحتمل أكتر

لو تنطقى الموال

لازم يروق الحال

محتاجه ليا دراع

وشراع وراحة بال

محتاج ليكى نجوم

هايمه ف حضن هلال

لو بحرى نام اسقيه

صحيه وبوسى عنيه

ياما بكره يسقينا

خليه طريق البوح

يصبح طريق مرمر

قلب الوطن مجروح

لا يحتمل أكتر

توبه

لأنك منى فلن تتركينى

ولن تحرمينى من الأغنيات

لأنى لقيتك دون اختيارٍ

ستبقين قربى حتى الممات

لأن انسحابك منى انتحارٌ

وموت البراءة والأمنيات

جفاءٌ بقلبى تخلصت منه

فقد كان نبتاً غريباً ومات

من الآن عمرى لديك ارتضاءً

وفى الليل يغمر قلبى سناك

أنا لن أعيش إذا غبتِ عنى

فنبض الفؤاد يقيناً هواك

أنا كنت طفلا ًيريد احتواءً

وما ضم حلم الليالى سواك

فحين اللقاء أذوب اشتياقاً

ولو ترحلين فقلبى هناك

أعود لكى نستعيد الحكايا

وأعبر نحوك بحر الحنين

وأعرف قلبك طفلاً بريئاً

فيوماً يصد وألفاً يلين

سترضين عذرى ولن تجرحينى

ولن تستبيحى غرام السنين

فكل المحبين عاشوا بوهمٍ

وحبى وحبك عين اليقين

حين أحبك

حين أحبك

أعبر كل بحار الدنيا

فوق جسور الصبر..أمُرّ

أرحل نحو جهاتٍ أخرى

أغرس فيها حلم العمر

أعشق كل حروف أ ح ب كِ

أسكن فى أوراق الزهر

أبحر فى عينيك طويلاً

علِّى أعرف سر السحر

أبصر فى عينيكِ بلادى

أغرق فى قنينة عطر

بدوق الشهد بكفوفك

عشقتك فرحه جوايا

ينور ضيها ليلى

أنا حاسك

انا نُصِّك

عيون قلبك قناديلى

ولو ببعد أنا مره

عطش روحك يناديلى

أجيلك

ترتوى منى

أغنيلك وتدعيلى

أكون حضنك

وأحميكى

أفضفضلك وتحكيلى

بحبك

أيوه بالفطره

وقبل عنيا ما تشوفك

يزيد المُّر ف الدنيا

وأدوق الشهد بكفوفك

أنا عاوزك

تقولى فرحتى أنت

باحساسك

مع حروفك

تحسينى

اكون منك

وأكون أمنك مع خوفك

تخافى لو أضيع منك

وأغلى حتى من شوفك

أنا عارف

ف روح روحك أنا ساكن

وبتدارى ورا كسوفك

العرب جرب ... وأنا طفسطائى

أثناء تصفحى لبعض المدونات دخلت بالصدفه مدونه اسمها بنت القمر فى أول الأسبوع تقريباً ,كانت عامله بوست بمناسبة ذكرى نصر أكتوبر عباره عن صور لبعض قيادات الحرب مع تعريف بكل منهم , بوست لا يفتح مجالاً لأى نقاش , وعليه ومع عدم معرفتى بصاحبة المدونه دخلت التعليقات عشان أقولها كل سنه وانتى واحنا طيبين

. بس وانا بعلق لفت نظرى فى تعليق الأخت شهروزه الكلام ده

: حتى الآن ينكر علينا أجلاف الصحراء و براميل الخليج النصر والفخر فى أكتوبر

لأنهم لا يملكون تاريخا" يتفاخرون به

ولا حاضر يتباهون به

وبعدين لقيت صاحبة المدونه فى ردها على شهروزه بتقول الكلام ده

: مش بس براميل الخليج الي بيحسدونا علي اكتوبر وبينكروه علينا للاسف الشديد بعض الاخوة المصريين

اللي بيحبوا يتشيعوا لناصر ولو علي حساب اي شئ

بينكروا النصر وبينكروا المعجزه

فأنا قمت داخل كاتب الكلمتين دول

: أولا كل سنه واحنا طيبين

بس انا مش فاهم ايه حكاية اللى بيتحيزوا لناصر وبينكروا انتصار اكتوبر

مين قالك المعلومه الفشنك دى؟

الحرب بدأت فى يوليو 67 بمعركة رأس العش اصلا

ومفيش حد ينكر دور عبد الناصر فى اعادة بناء الجيش وحرب الاستنزاف

ومحدش يقدر ينكر دور السادات فى تكملة المشوار

رحمة الله على الاتنين

هو احنا لازم نبقى فريقين فى كل حاجه حتى فى الفرحه؟

وكمان نحشر سيرة الخليج فى الموضوع

هما ساعدونا فى 73 وده كل الناس عارفاه

وبراميل وكلام بايخ مالوش لازمه

تقريبا عشان تبقى مثقف ومتنورلازم تشتم فى الخليج

على اساس انهم مش عرب ولا بنى ادمين يعنى

وده كان رد بنت القمر صاحبة المدونه عليا

: محمد الهنداوي

وحضرتك طيب

اول زياره وتقول علي معلوماتي فشنك!!!اشكرك بشده

لا في ناس متعصبه جدا لناصر وبتنكر نصر اكتوبر وشايفه انه مؤامره غربيه لاخراج مصر ما اللعبه السياسيه في الشرق الاوسط وتحييدها علي الاقل وفي مدونات قائمه بذاتها عشان تبخ الكلام دا انت بس اللي مش واخد بالك

تانيا انا نا انكرتش لا دور جمال عبد الناصر ولا ما اكمله السادات

تالتا

تلاخوه العرب مش براميل ولا حاجه دول ناس زوووق زوووق وهما بني ادمين زينا بس للاسف برضه حضرتك مش واخد بالك ان فريق مش قليل منهم بيكره المصريين وبرضه بينكروا النصر وخصوصا مش الخلايجه اقول لحضرتك انا دول الشوووام ودا من اقاءات ليا مع شوام كتير دا حتا واحد لبناني نعرفه دخل معانا في جدل ان اكتوبر دا لعبه بالنسبه لتحرير جنوب لبنان

ورغم ان المقارنه غير جائزه بين حرب شامله علي ارض مكشوفه وجبهه طويله ممتده الي حرب شوارع تعتمد علي الكر والفر ودا مع كامل احترامنا لحزب الله لكن الغيره بقا تعمل ايه فيها

علي فكره مسمعتش عن عبد الباري عطوان؟؟اهو دا صحفي فلسطيني كرس حياته للحقد علي كل ما هو مصري يا ريت حضرتك تبقا تتابعه واهلا بيك دايما بس من غير ما تشتبك مع الزوار الاخرين

تحياتي

أنا بقى جيت رديت على كلام بنت القمر الأخير ده فى عدد من النقاط

: قلتلها انها كررت تعبير البراميل فى ردها على شهروزه وده معناه انها موافقه عليه وانا متحفظ على وصف أى بنى ادم بهذا الوصف

. وقلتلها انه يُفهم من كلامها ان كل الناصريين او معظمهم بينكروا نصر أكتوبر وقلتلها ان محدش يقدر ينكر النصر العظيم الا لو كان أهبل وانه على حد علمى ان فيه مجموعه من الناصريين وغيرهم شايفين ان ما أخرج مصر من دائرة اللعبه هى كامب ديفيد وليس الحرب وان ما تحقق بالنصر العظيم أضاعته المفاوضات فى كامب ديفيد

. وكمان زعلت من تعبير (فشنك ) فانا قلتلها ان دى مش شتيمه وانا بالطبع لا أقصد اى اهانه وانما فشنك فى نظرى تعنى غير صحيح او غير حقيقى وهذا رأيى فى الجزء الخاص بكون الناصريين بينكروا نصر أكتوبر

وقالتلى انها اتهمتها بانها انكرت دور عبد الناصر فى الحرب وانا قلتلها عندى دى يعنى ما قصدتش كده دانا حتى قلت ان الحرب بدات فى عصر عبد الناصر بمعركة رأس العش وأكملها السادات بالنصر رحم الله الاثنين

بخصوص كره العرب لمصر فواضح من ردى انى لم اعترض ولم اوافق انا بس قلتلها انه فيه اكيد عرب بيكرهوا مصر وفيه كمان مصريين بيكرهوا مصر , بس انا ضد التعميم ولما نيجى نقول ان كل العرب ليهم رأى موحد فى موضوع ما يبقى لازم يكون فيه استطلاع رأى اتعمل وخرج بالنتيجه دى , وسألتها ان كان عندها استطلاع زى ده؟ لانها مثلا قالت ان الشوام بينكروا الحرب واستشهدت بواحد لبنانى فانا قلتلها ما يصحش نختصر الشوام فى واحد وبعدين السوريين الى حاربوا معانا عرب وشوام معقوله بينكروا الحرب؟

وحاولت تدينى مثال ان الفلسطينيين زى باقى العرب والدليل عبد البارى عطوان اللى بيهاجم مصر , وانا قريت للراجل فى القدس العربى وسمعته على الجزيره وبى بى سى العربيه كتير بيهاجم النظام المصرى ومش بيهاجم مصر وقلتلها ان مصر لا تختصر فى حكامها

. عاوز أفكركم انها قالتلى بلاش اشتباك مع باقى الزوار

انما مافيش مشكله ان الزوار دول يشتبكوا معايا ويشتمونى كمان , خد عندك كلام الأميره أوسه فى ردها عليا

: انت جاى تذاكر؟ بتكتب جزء من تعليق بنت القمر وترص شوية طوب بعده؟(لاحظ السخريه وتعبير الطوب فى وصف كلامى

) انت كده مش بتفند اراء الاخرين انت بتحاول تقمعهم ( شوفت ازاى؟ على اساس انى شايل مقمعه وانا داخل)

وبتسأل عن استطلاع على اساس انها معهد احصاء وسعادتك محلل سياسى؟ (برضه سخريه من سعادتى بس الاهم ان اللى يتكلم عن حاجه المفروض يجيب دليل ومادام هو مش معهد احصاء يبقى ما يتكلمش عن الاحصاءات)

وشرحتلى اد إيه ان العرب بيكرهوا مصر , ولو مش شايف يبقى دافن رأسى فى الرمل واحتمال تطلع عربان صغيره ( خفة دم واضحه طبعا) .

وشايفه ان لهجتى فى الحوار متدنيه (بس ما قالتش متدنيه عن ايه او بالنسبه لايه) وفيه ترفع ( وعلى حد علمى ان الترفع مش حاجه وحشه لانه دايما بنقول ترفع عن الصغائر انما الكبرياء او الغرور هو اللى مذموم) واصرار عجيب( وما قالتش برضه اصرار على ايه , على رأيى يعنى؟ وهل اصرارى على رأيى يحسب عليا ؟)

نكمل كلامها : انت جاى تدافع عن أكياس الجوافه المسماه عرب؟

نسيت أسألك جنسيتك ايه؟ ( التلميح السخيف والساقط هنا هو ما لم أتحمله وفكرنى على طول بعبد الله كما لومحمد على ابراهيم فى تعاملهم مع أى مخالف فى الرأى

) كلامك اعتراض من أجل الاعتراض (دخلت ضميرى) وانت سفسطائى ( ده أنا برضه

) ختمت بقى بقولها انا عنصريه ضد العرب لأن العرب جرب

جت بعدها الحاجه شهروزه تكمل بقى

: انا مش مذاكر تاريخ وعشان كده معرفش ان كلامهم صح

وبتنصحنى أروح شهرين أى دوله عربيه عشان اتأكد بنفسى لما ينادونى ب يا ابن الرقاصه او يدونى بالقلم على قفايا

وبتصحنى انى ادخل موقع العربيه نت و اتكلم عن مصر او انصر بتاعى(عشان اللبس هى اكيد تقصد جمال عبد الناصر على اساس انه بتاعى يعنى شوف الأسلوب ) وانا اشوف من التعليقات ان كلامهم عن العرب صح

. ختامه بقى مش مسك لا ده حاجه غير كده خالص من بنت القمر صاحبة المدونه

: محمد الهنداوي

بما ان معلوماتي فشنك وكلامي مرسل بلا دليل ودمي يلطش واحنا رمضان ومش طالبه مناكفه مع حد وانت واخداك القوميه والعروبه

فانا اشكرك علي مجهودك في تاني تعليق

وعلي زووقك المتناهي

واستلم من اختاي اوسا وشهروزة

لانه علي راي من قال مفيش فايده

كل سنه وانت زى ما انت

ما اعترضتش هنا على اشتباك الزوار معايا

وما ردتش على كلمه واحده من كلامى على اساس اننا فى رمضان ومعرفش لو مكناش فى رمضان كانت هتعمل ايه؟ وحتتين بقى من نوعية زوقك المتناهى (اللى هو مش محتاج تأكيد منها ولا انا محتاج منها شكر)

وانا واخدانى القوميه والعروبه وده صحيح وافخر به بس ما قلتليش هى وصاحباتها ايه اللى واخدهم بالظبط؟

واستلم من اختيها على طريقة عليه يا عيال , وبعدين تهنئه رقيقه من الاخت بنت القمر (كل سنه وانت زى مانت) ياستى وانتى وصاحباتك زى مانتوا برضه

هما بس فاتهم يفكرونى بالشيكات اللى باخدها من القذافى واللى كنت باخدها من صدام

. انا حبيت اعرض الموضوع ده اللى خلانى اكتشف ان اسلوبى متدنى , وانى بقمع الاخرين , وسفسطائى , وكلامى زى الطوب , ومش مصرى صحيح , وبدافع عن اكياس الجوافه وبراميل النفط أعداء الوطن . وكمان أجرب بما نى عربى وان العرب اللى أبوهم اسماعيل عليه السلام ومنهم سيدنا رسول الله (ص) كلهم جرب

. أرجوك ما تستعجبش لو دخلت مدونة شهروزه ولقيتها بتدافع عن الصحفيين شهداء الحريه وحقهم فى الاعتراض والنقد

. وأخيرا لو انا كنت غلطت فى أى كلمه يا ريت حد ينبهنى عشان اصلح الغلط , أما بخصوص الكلام اللى اتوجهلى فأنا أحتسبه عند الله

.

دولا مين ودولا مين ...دولا ولاد الفلاحين

السادس من أكتوبر

زمان أيام المدرسه ماكنتش أعرف عن اليوم ده غير إنه أجازه من المدرسه،وطبعاً محدش فكر يقولنا ايه اللى حصل فى اليوم ده بالتفصيل ولا اللى حصل قبله فى 67 يمكن عشان ده بيتعارض مع اتفاقية السلام مع اسرائيل الشقيقه انهم يوعوا الأطفال على اللى حصل من أولاد العم .

المهم بعد ما كبرت شويه ابتديت أعرف اننا فى اليوم ده هزمنا جيش العدو الصهيونى وكانت بدايه لتصحيح وضع خطأ بدأ سنة 67 .

لما كبرت أكتر شويه عرفت كمان اننا حاربنا فى 73 عشان نخرج اليهود اللى كانوا لابسين بدل عسكريه كاكى من سينا وبعد كده قعدنا معاهم واتصالحنا وشربنا فى صحة بعض عشان ندخل نفس اليهود سينا تانى بس بمايوهات بكينى كاكى او أى لون تانى او من غير مايوهات خالص حسب درجة الحراره يعنى

. عرفت كمان انه وبرغم الهزيمه المره فى 67 الشعب ما انكسرش بصوره كامله بدليل انه بدأ حربه للتحرير بعد كم أسبوع بس .

دلوقتى احنا مكسورين من غير حرب ولا حاجه .

لما رحت سينا وشفت الوضع اللى البدو واهل سينا عموما عايشين فيه وبعدين رحت شرم الشيخ فى الحقيقه مع جمال المناظر هناك انا مقدرتش استمتع باللى شايفه زى ماكنت متخيل

فضلت أفكر هو الفلاحين الغلابه اللى ماتوا فى الحرب دول كان فى بالهم وهم بيضحوا بروحهم انهم بيحرروا سينا لغيرهم؟

وانهم مش مكتوب لاخواتهم او أولادهم من بعدهم انهم يدخلوا سينا إلا عشان يشتغلوا فى المطاعم أو القرى السياحيه وكمان معرضين للطرد والتضييق طول الوقت؟

او كانوا يتخيلوا مثلاً انه هييجى يوم الصهاينه يبرطعوا فى سينا اللى شربت دم الفلاحين المصريين ويوسخوها وكمان يدخلوا من غير تأشيره؟

ولا ان كل التضحيات اللى عملوها دى هتختصر كلها فى اول طلعه جويه؟

أمانه عليكوا كل ما ييجى اليوم ده تفتكروا إن الفلاحين والغلابه هما اللى حرروا سينا

وهما اللى هيحرروها تانى لو لا قدر الله حصل حاجه تانى

ادعولهم بالرحمه, واللى يعرف حد منهم شخصيا او يعنى حد من قرايبه يعلق صورته فى بيته ويحكى لولاده عنه حاول تدخل أى بيت فى اى شارع فى مصر غالباً هتلاقى فيه شهيد او مصاب او واحد رجع من الحرب سليم بفضل الله .

خلينا نفكر نفسنا طول الوقت ان البلد بتاعتنا احنا , ماهو مش معقول حد يدفع حياته فدا حاجه مش بتاعته

. حاولوا ما تنسوش الناس دول حتى لو غيرنا نسيهم

وماتنسوش كمان الأسرى اللى اتدفنوا أحياء فى .67

انا متأكد إن مصر ما بتنساش ولادها , حتى لو كان اللى خطفوها بيحاولوا يخلوها تنسى

. كل سنه واحنا طيبين ,كل سنه واحنا عارفين عدونا كويس جدا , كل سنه واحنا فاكرين دم الشهدا وشايلينهم فى قلوبنا وعنينا .

ملحوظه:

من أجمل ما كتب من أعمال أدبيه معبره عما قلته هى رواية الحرب فى بر مصر للأديب يوسف القعيد واللى اتحولت لفيلم ( المواطن مصرى) لعمر الشريف