ولو أقدر

ولو أقدر

أنور بالمنى ليلك

أكون نجمه ولا أتأخر

وأعمل حبنا جنه

نعيش فيها ونتطهر

من الدنيا وما فيها

أنا عاوزك

ومش أكتر

مانا أصلى

ماليش ف الدنيا دى حاجه

وقلبك مش هنا جنبى

بحس بروحى بردانه

ونور الشمس متخبى

ودمعة شوق محاوطانى

تقول البعد مش ذنبى

وفى الزحمه

بحس الوحده من غيرك

وبحلم نلتقى تانى

بحس اديكى ف اديا

واحس عنيكى حاضنانى

وبصحى التقى روحى

وحيد والحيره ساكنانى

اتارى كل ده فكره

وسكرة حب واخدانى

وأقول بكره

هنرجع تانى نتقابل

ويكبر حلمنا اكتر

هعيش من تانى ف عنيكى

ويصبح صبرنا سكر

وأقولك ان انا صدفه

قابلت عنيكى ف الزحمه

بكل براءه شدونى

وبالطيبه وبالرحمه

سمارك حته من بلدى

وطيبتك هى عنوانك

سدود ياما كتير بينا

هعديها علشانك

انا فرحه ملكتيها

انا ريشتك والوانك

تعالى لونى حزنى

وحسى قلب عطشانك

ف نفسه يرتوى منك

ومن عطرك وريحانك

بدوق الشهد بكفوفك

عشقتك فرحه جوايا

ينور ضيها ليلى

أنا حاسك

انا نُصِّك

عيون قلبك قناديلى

ولو ببعد أنا مره

عطش روحك يناديلى

أجيلك

ترتوى منى

أغنيلك وتدعيلى

أكون حضنك

وأحميكى

أفضفضلك وتحكيلى

بحبك

أيوه بالفطره

وقبل عنيا ما تشوفك

يزيد المُّر ف الدنيا

وأدوق الشهد بكفوفك

أنا عاوزك

تقولى فرحتى أنت

باحساسك

مع حروفك

تحسينى

اكون منك

وأكون أمنك مع خوفك

تخافى لو أضيع منك

وأغلى حتى من شوفك

أنا عارف

ف روح روحك أنا ساكن

وبتدارى ورا كسوفك

حب نفسك

ياللى ياما حلمت تلقى

قلب جنبك يحتويك

كل احلامك يا قلبى

بالحيا مدفونه فيك

مافى صاحب انت قلبه

مافى حد بحاله ليك

مين بيزعل لو فارقته

مين مسح دمعة عنيك

لو بقيت ف الدنيا وحدك

او براحها ضاق عليك

اوعى يوم اليأس ياخدك

وانت عمرك بين اديك

عيش لوحدك غصب عنك

انت ليه محتاج شريك

لو ما حبيتش انت نفسك

مين ف يوم هيحس بيك

حب نفسك

واحمى قلبك

لو هموم الكون عليك

اعرف انك انت صاحبك

وان حبك فيك حاميك

الشعب قال كلمته

الشعب قال كلمته

قلنا كفايه كتير

امتى هنخرج بقى

يا شعب كله أسير

كل البشر ترتقى

واحنا ف قعر البير

مين يا ترى

حلمى أنا

نفسى أحل المسأله

الأرض دى أرضى أنا

وأنا من زمان

غاوى وله

بعشق غناها وحزنها

وأسكن بنارها وضلها

شايف سمارها لؤلؤه

فوق الصبيه 00والوله

طب تبقى فين المشكله؟

أمال أنا

مش حر ليه

وإديا ليه متكبله؟

نفسى أفوق من غربتى

نفسى ف جواب الأسئله

مين يا ترى00

كتِّف حبيبتى فى الخفا

وبغِّل شد السلسله؟

غمى عنيها وقلبها

مين يرضى ليها البهدله؟

مين يا ترى000

خانق بشّره حلمنا

سارح ف كل الأمكنه

ينشر فصول المهزله؟

فكر معايا ف حلها

وانا هبتدى00

بالبسمله

اتارى الحلم كان طايش

لا عمرى حلمت أكون فارس

ولا بقصر وعليه حارس

حلمت ألقى ف يوم مطرح

ف جنة قلب بنوته

تقوللى ان انا ليها

واعيش من تانى ف عنيها

يروح الحزن ويسيبنى

واعيش الحب حدوته

كبير الحلم ده يعنى؟

وليه القهر يمنعنى؟

بحايله بس مش راضى

يسيب لى حتى فتفوته

حلمت بروحى دى حره

وايامنا ماهيش مره

وباين كل احلامى

هتفضل فيا مكبوته

حلمت افرح وده حقى

اتارى الفرح متنقى

لناس تانيه مانيش منها

غناوى الحب حابسينها

ده حتى بلدنا واخدينها

واتارى الحلم كان طايش

بلدنا مش بلد طيب

ولا من جرحنا قريب

ماعادش ترابه ف الننى

وانا مش حابّه اكمنى

قضيت كل اللى فات منى

مفكر ان انا عايش

واتارى الحلم كان طايش