هل أنت فاسد؟

من الناس من يشكك فى وجود الشيطان أصلاً ويعتبرون أن شيطاننا هو أنفسنا أو رغباتنا وميلنا البشرى نحو شهوة العصيان, ولولا أن الشيطان حقيقة مؤكدة بالقرآن لكنت قد صدقت ذلك. ة

كثيراً ما أسأل نفسى إن كانت هناك ثوابت بالفعل أم أن الكبر يمنعنا من الاعتراف بخطأ تصوراتنا وقناعاتنا؟ وإن كانت الثوابت موجودة فهل هى نسبية أم مطلقة؟ هل يصح ان نقول عن شئ ما أنه ثابت ونسبى فى آن واحد؟ لا أدرى.ة

فى اليومين الماضيين ضبطت نفسى متلبسا بالفرح حين خسرت الجزائر أولى مبارياتها وبالحزن حين تاهلت للدور الثانى فى البطولة, شعرت بالخجل الشديد من نفسى وبالحيرة أيضا, ألست من المؤمنين بالعروبة والقومية كما أردد دوماً, هل أعيش بشخصيتين أصدر إحداهما للآخرين بينما أكمل حياتى بالأخرى؟ عندى يقين أتمنى أن يكون حقيقيا وهو أننى لست منافقاً, ماهو التفسير إذن؟ة

ربما يرى البعض أن الأمر تافه ولا يزيد عن كونه مجرد رأى فى مباراة كره, لكنى أراه ازمة حقيقيه, هل الإعلام هو الشيطان فعلا؟ هل نجحوا فى تسميم أفكارى وأنا من يرى نفسه عاقلا لا يمكن أن يزحزحه عن "ثوابته" كائن من كان؟ وإن كانوا قد نجحوا فى هذه فما يدرينى أنهم لن ينجحوا -أولم ينجحوا- فى غيرها؟ة

كثيراً ما أقول لنفسى حين يدور حديث عن الفساد والفاسدين امامى- وما اكثرهم – ان الفاسد لم يولد فاسداأ وربما كان فى شبابه مثالياً ويكره الفاسدين أيضا, فمن الذى أفسده؟ وكيف ذلت قدمه؟ إن الفساد فى رأيى ليس بالضرورة أن يكون سرقة أو رشوة او استغلالاً للنفوذ, بل من الممكن أن يقتصر على الزيف, زيف الشخصية وزيف الأفكار والمعتقدات, حيت تروج لمعتقد ثم تبيعه عند أول اختبار فأنت فاسد, حين تنتقد ما تراه انحرافا ثم تأتيه حين تضعك الظروف فى طريقه أو تضعه فى طريقك فأنت فاسد, حين لا تشعر بالدهشة ويصيبك الدوار وأنت تتابع أخبار الفساد وأهله فأنت فاسد حتى فى ظل قناعتك بأنه فساد, لم لا والفاسد نفسه يدرك أن ما يقوم به هو فساد.ة

لا أدرى إن كان ما كتبت تساؤلات طبيعيه من شخص يدعو الله أن يخرجه من الدنيا لا له ولا عليه أم أنها سوداوية فى غير محلها وانعكاس لحالة من القلق والاضطراب تلازمنى منذ فترة حتى ظننتها لن تنتهى, لا أعرف الإجابة ولا أملك سوى أن أسأل الله السلامة.

خطاب إلى - لا مؤاخذه - الأمه

من زمان كنت واخد عهد على نفسى انى ما ادخلش فى جدل مش هيجيب نتيجه, ولا اناقش امور تستهلكنى فى حين ان الزمن وحده كفيل بحسمها لاقتناعى بأن معظم ان لم يكن كل ما يشغل وقت واذهان الناس حاليا وممكن يكون سبب فى صراعات ومشاحنات كتير هيبقى بعد وقت قصير جدا مجرد شئ عادى نمر عليه مرور الكرام.ه

الكلام ده ينطبق على مناقشة ما اعتبره من المسلمات والثوابت لان مجرد انى اقبل المناقشه فى ثوابتى او الانشغال بتوضيح ما هو واضح يعتبر خطوه للخلف واستهلاك للنفس من غير فايده حتى لو قدرت انتصر لوجهة نظرى فى النهايه.ه

بس احيانا فيه مواقف بتفرض عليا انى اتكلم ومبقدرش امسك نفسى الصراحه, زى مثلا لما كنت بشتغل فى نادى كبير جدا فى مدينة نصر وكان فيه سيده محترمه بتيجى العياده تقريبا كل يوم وبالتدريج بدأ يبقى فيه بينا كلام فى امور مختلفه وكعادة المصريين الايام دى لازم الكلام ياخدنا لظروف البلد واحوالها, بالمناسبه محدش عاجبه حال البلد حتى مدام سلوى دى اللى ممكن أى حد يشوفها فى مستواها الاجتماعى اللى هى فيه ويكفى كمثال عضويتها فى اكبر اندية مصر ممكن يفتكر ان حال البلد عاجبها جدا جدا, بس كلامها كان بيقول ان الحال مش عاجبها وبغض النظر هو مش عاجبها ليه مره قالتلى عارف مين السبب فى اللى احنا فيه, وبغض النظر برضه ايه اللى هى فيه قلتلها مين؟ قالتلى جمال عبد الناصر.ه

انا لقيت نفسى مضطر اقولها ما معناه انه بعيدا عن السياسه والايديولوجى فانا عندى رد شخصى على كلامك وهو انه لولا عبد الناصر مكنتش هكون قاعد معاكى دلوقتى فى مكان زى ده, لان سبب وجودى هنا هو مهنتى اللى هى كل ما املكه حاليا فى بلد ما بعد عبد الناصر, وانه انا وصلت لمهنتى بالتعليم وانه منطقى انى اعترف بفضل اللى كان سبب فى انى اتعلم انا وكتير غيرى(ممكن تكون هى منهم على فكره) زى ماكان سبب فى ان جدى الفلاح يبقى عنده ارض يعيش منها واللى كان سبب اننا اترحمنا من بوس الايادى لفتره معينه على الاقل قبل ما نرجع نبوسها تانى(مشوها الايادى معلش). وانه الراجل مات من 40 سنه وهى فتره كافيه جدا انه اللى هو بوظه يعنى كان يتصلح ونبقى ميت فل وكده يعنى, بس احنا مش فاضيين.ه

انا مش ناصرى ولا اعرف اصلا ماهى الناصريه لانى اعتقد ان المبادئ اللى ناصر نادى بيها ماكانتش من اختراعه واكيد كانت موجوده قبله وهى قيم انسانيه نبيله سواء نجح فى تحقيقها او لا, كل اللى اعرفه انى معترف بالجميل وبس, وانى بحبه بصفه شخصيه حب انسانى مش ممكن يخضع لاعتبارات سياسيه ولا يكون محل جدل او نقاش.ه

موقف تانى من 3 ايام فى المستشفى لقيت واحد زميلى مشغل على موبايله خطبه للسادات, انا استغربت شويه وقلتله اول مره اشوفها دى, قاللى انا من قريه جنب ميت ابو الكوم ومدرستى كانت فى ميت ابو الكوم ولو دخلت اى بيت هناك هتلاقى صوره للسادات مع صاحب البيت او ابوه او جده, قلتله بس ده دور العمده مش دور رئيس الدوله, قاللى احنا فى السبعينات بلدنا كانا فيها سنترال دولى, قلتله طب واحنا بلدنا كان فيها ايه؟ مش هو رئيس مصر ولا رئيس بلدكوا بس؟ سكت شويه وقاللى كفايه انه حرر سينا, قررت بقى انى اسكت خالص وما افتحش على نفسى وجع الراس, اصلى معرفش ايه رد فعله لو قلتله وهى سينا اتحررت امتى؟ه

بمناسبة السادات الليله منى الشاذلى عملت تقرير عن النشيد الوطنى وقالت ان السادات غير النشيد اللى كان بيقول والله زمان يا سلاحى لانه بقى غير مناسب لعهد السلام اللى بدأ بعد كامب ديفيد(استغفر الله العظيم).ه

بالمناسبه برضه كل سنه وكل اللى بيحتفل بالثوره طيب, وزى ماحنا عارفين ان مافضلش منها غير يوم الاجازه عشان كده حاولوا تسمتعوا بالاجازه باعتبارها اخر انجازات الثوره.ه

وبالمناسبه برضه كمان مره انا مش لاقى اى مبرر ان اليوم ده يفضل اجازه رسميه فى ظل النظام الحالى واللى سبقه ولا ان حسنى يخطب للأمه فى عيد الثوره, قال امه قال, طب ماكانش ممكن انهم يحتفلوا باليوم ده بأنهم يوقفوا البيع فيه, او نعمل حمله "احتفظ بمصنع واحد ليكون شاهدا ان الثوار مروا من هنا" بدل من شعار" بنى فى عهد عبد الناصر واغلق فى عهد السادات وبيع فى عهد مبارك" اللى مرفوع فى كل حته فى البلد دلوقتى؟

عن ابراهيم عيسى والتطبيع

هل تذكرون الفيلم السينيمائى(السفاره فى العماره)؟ أعتقد أن كثيرين قد شاهدوه ,معظم من شاهده وأنا معهم اعتبرنا الفيلم موقفاً حاداً شديد الوضوح ضد التطبيع مع عدونا الصهيونى , ولكن لأن طبيعة الفن وطبيعة الدنيا عموماً هى تعدد زوايا الرؤيه للحدث الواحد,فقد رأى البعض أن الفيلم يمكن اعتباره عملاً تطبيعياً صرفاً , فاظهار كراهية الشعب المصرى للكيان الصهيونى لم يأت بجديد وانما الجديد كان هو ظهور السفير الصهيونى على الشاشه لمده طويله عن طريق ممثل كبير له قبول وهو لطفى لبيب,اعتبر البعض ذلك خطوه تطبيعيه تتخفى فى ثوب رفض التطبيع.ه

الحقيقه أننى لا أنوى الحديث عن الفيلم , كانت تلك مقدمه لسؤال أريد طرحه,هل ما تفعله جريدة الدستور منذ صورها من مقاومةٍ لمخطط توريث الحكم فى مصر والذى يبدو وكأنه حائط صد ضد حدوث التوريث,هل هو فى الحقيقه دعماً لتلك الخطوه وتسويقاً لها بين البسطاء من أبناء شعبنا؟ بمعنى جعل كلمة التوريث مشاعاً على كل الألسنه بعد أن كانت كلمة جديده قبل 4 أو 5 سنوات؟ه

هل يعد موقف الجريده تمهيدا لحدوث التوريث عبر إشاعة اليأس فى النفوس من استحالة تحسن الأوضاع عبر تسليط الضوء المستمر على الفساد الذى ينخر فى عظام الدوله وكأنه بلا علاج ؟ه

بمعنى أخر,هل خدعنا ابراهيم عيسى؟ ام أن الأمر كله يرجع لعدم ثقتنا فى وجود قلم شريف يكتب فعلاً لوجه الله فى هذه الفتره حالكة الظلمه؟ه

هل يقصد ابراهيم عيسى عندما يصف الأمه بالخنوع والسلبيه والجبن مراتٍ عديده فى مقالاته هو استثارة الهمم فعلاً أم اشاعة اليأس واظهار عدم استحقاقنا لحياةٍ أفضل كما أعلنها نظيف قبل ذلك عندما وصف الشعب بعدم النضج لاستقبال الديمقراطيه؟ه

هل عيسى بالفعل جزء من لوبى متأمرك يتحرك لأهداف غير معلنه كما يقول منتقدوه بعد مقالته الأخيره تعليقاً على حادثة الحذاء(وهى مقاله سافله بالمناسبه كما أراها) ؟ه

هل من الضرورى أصلا تصنيف الإنسان وقولبته كأن نقول هذا متأمرك, وهذا إيرانى الهوى,وذاك جزء من اللوبى الصهيونى فى الاعلام المصرى وهكذا,أم نحاسب الكاتب على مواقفه بالقطعه,أى نقول له احسنت أو أسأت حسب ما يكتبه كل مره, هل مازال هناك ثوابت أصلاً كالعروبه والقوميه والأمه الواحده أم يجب الشك فى كل شئ وإعادة الحسابات كل يوم ألف مره؟ه

الحق أننى لا أدعى امتلاك الإجابه..فقط أطرح التساؤلات لعل احداً يفيدنى, ويريحنى.

سؤال فى الحريه..وعنها

زميلتى فى العمل كانت تحدثنى عن مشكله نفسيه لاحدى بناتها عمرها 16 سنه,ولأنى أعرف أن أولادها مازالوا أطفالا,استفسرت منها فقالت انها احدى بناتها فى الكنيسه,عرفت من زميلتى أنها تخدم فى الكنيسه..وحسب ما فهمت أنها مسئوله عن مجموعه من الفتيات تعطيهم عظات روحيه وتتواصل معهم وتساعدهم فى حل مشكلاتهم,هذا غير دور الكنيسه فى مختلف المجالات ككيان اجتماعى متكامل يكاد يستغنى به الزائر عن مؤسسات كثيره فى المجتمع كالمسرح والمكتبه وربما السينما لا أعرف. كل ما سبق لا اعتراض لى عليه(حتى وان كنت أرى أن هذا من ضمن الأسباب الرئيسيه لعزلة المسيحيين فى المجتمع والتى يشتكون منها),الملفت للنظر أن هذا الحوار معها تزامن مع خبر قرأته فى الدستور المصريه نشرته بتاريخ الأحد 27 يوليو فى صفحتها الأولى,مضمون الخبر يقول أن أمن الدوله بمحافظات الصعيد(بنى سويف والمنيا وأسيوط وسوهاج وقنا) استدعت أئمة المساجد ممكن كانوا قد تقدموا بطلبات للحصول على إذن بالاعتكاف وإقامة صلاة التهجد فى العشر الأواخر من رمضان وأخبروهم أن طلباتهم مرفوضه وكان المبرر أنها (أفعال تؤدى إلى حشد الناس ونقل الفكر السلفى الجهادى بينهم),وتضيف الجريده على لسان أحد الأئمه أن الضابط أخبره أن الاعتكاف يواكبه حلقات حول أمور الدين والدنيا(وطبعا النقاش بيتطرق إلى عدالة الخلفاء الراشدين والشورى فى الاسلام والوقوف فى وجه الحاكم إذا لم يقم بتطبيق الشريعه الاسلاميه),مابين القوسين منسوب للضابط. يدور برأسى سؤال واحد الآن:ما هو تعريف حرية ممارسة الشعائر الدينيه؟

هصلى هصلى..مهما حصل لى

اعتداء مسلح على محل للذهب فى حى الزيتون يملكه أقباط

كانت تلك هى صيغة الخبر فى اغلب وسائل الإعلام ,بعد وقوع الحادث بدقائق قليله,لاحظ التركيز على جملة يملكه أقباط(مسيحيون)

أول ما تبادر الى ذهنى وقتها هو تخيل حدوث اعتداء مماثل على محل للذهب فى الزيتون أيضاً يملكه مسلمون(بما انه بات من الطبيعى جدا أن نتكلم عن المواطن المصرى اما باعتباره مسلما او اعتباره مسيحيا) هل كان الخبر سيقال هكذا:اعتداء مسلح على محل للذهب فى حى الزيتون يملكه مسلمون؟

أعتقد ان الاجابه هى لا,والسؤال التالى سيكون ولماذا؟ بمعنى ولماذا أصبحنا مهيئين تلقائياً لاعتبار هذا الاعتداء موجهاً ضد المسيحيين؟ لماذا لم نفكر ولو للحظه انه اعتداء اجرامى قام به بعض اللصوص ضد محل للذهب؟ , وأغلبنا يعرف أن تجارة الذهب من ضمن صناعات اخرى كثيره يكاد يغلب عليها الطابع المسيحى ربما بحكم توريث المهنه, أى أننا لو افترضنا أن عصابات السطو المسلح قامت بعشر عمليات سطو على محال للذهب ربما يتصادف أن يكون أغلبها أو حتى كلها ملكاً لمسيحيين؟

البعض يحاول أن يبدو معتدلاً ولا يصرح باعتقاده أن الاعتداء موجه ضد المسيحيين ويكتفى بالقول لننتظر التحقيقات قبل أن نطلق أحكاما جزافيه,وفى رأيى أن مجرد وجود تلك الفكره فى العقل الجمعى المصرى يعتبر كارثه بكل المقاييس, فكرة أن المسيحيين لا يمكن أبداً أن يكونوا طرفاً فى أى نزاع, او ضحايا لعمليات ارهابيه أو اجراميه, ولا أعرف لماذا,ألا يبلغ عدد المسيحيين فى مصر حوالى ستة ملايين وربما يزيدون؟ ألا يتواجدون فى كافة مدن مصر ويعيشون كمواطنين عاديين لا تضمهم أحياء منفصله خاصه بهم؟ ألا يجعل ذلك كونهم طرفاً فى المشاكل الحياتيه أيا كانت بشاعتها امراً متوقعا كونهم مواطنين يعيشون بتلك الدوله كغيرهم من سكانها؟ ألا يمكن ان يتبين بعد ذلك أن الجناه مسيحييون أيضاً(بالصدفه يعنى), ألا تذكرون معى مذبحة بنى مزار بالمنيا, كان الضحايا كلهم من المسلمين فاعتبرت جريمه قتل عاديه(وهى كذلك فعلا) تخيلوا معى لو كان الضحايا مسيحيين,ولم تتوصل الشرطه للجناه الحقيقيين كما حدث فعلاً,بالتأكيد لم يكن الأمر ليخلو من تلميحات بالطائفيه, واتهامات للشرطه بالتهاون مع الجناه كما أشيع فى حادثة الدير ونشرته المصرى اليوم فى تغطيتها للحادث , وكنا سندخل فى دائره مفرغه من التعصب الكريه نحن فى غنى عنها.

لماذا يعانى المسيحيون من تلك الحساسيه المفرطه؟ من المسئول الأول عن حالة الاحتقان التى تسود الآن؟فى الواقع لدىّ إجابه على السؤال الخير أفضل الاحتفاظ بها لنفسى, لماذا لا نتذكر أن أرشيف المحاكم يحتوى ملايين القضايا التى يختصم وربما يقتل فيها مسلمٌ مسلما آخر, او مسيحى يقتل مسيحياً آخر,لماذا سيطرت علينا فكرة أن المسيحى لن يكون ضحيه لأى اعتداء الا بسبب كونه مسيحياً؟

فى سياق تغطيتها لحادث الزيتون,تشير الصحف باستمرار إلى أن الكنيسه ستصبر ولن تتعجل الحكم على الحادث,وأن البابا يتابع الحادث من أمريكا,يعلنون ذلك من باب الحكمه أو التروى, وأنا أرى أصلا أن مجرد دخول الكنيسه طرفاً فى هذه الحوادث يعد أمراً خطيراً جدا,ما دخل الكنيسه بحادث سرقه حتى وان كان الضحيه مسيحيا؟ هل الكنيسه جهه قضائيه؟ هل هى مخوله قضائيا أو دستوريا بالتحدث باسم المسيحيين؟,هل الكنيسه دوله داخل الدوله, أم هى سفاره مهتمه بمصالح رعاياها وحقوقهم؟ان كانت كذلك فلتعلن ذلك رسمياً حتى تصير الأمور أوضح.

(هصلى هصلى..مهما حصلى..,سنقف فى وجه الارهاب ) شعاران من ضمن ما رفعه المتظاهرون فى الدير بالمنيا بعد الحادث الأخير

البعض استنكر على استحياء تلك المظاهرات وحاول ايجاد العذر لهؤلاء باعتبارهم غاضبين, وأنا لا أراهم الا مجموعه من لغوغاء, وان أردت التسامح أكثر سأصفهم بالحمقى والمغرر بهم, ما دخل نزاع على أرض لا يملكها أى من الطرفين بصلاة المسيحيين؟ ان كان الدير يملك ما يثبت ملكيته للأرض فلماذا لم يرفع دعوى قضائيه لاثبات حقه مع أن الأمر قديم والنزاع متجدد؟

وان كان الفلاحون يملكون وثائق تثبت ملكيتهم للأرض فلماذا لم يقوموا بذلك؟ الأمر فى رأيى يمكن ان نلخصه بجمله واحده(غيبة القانون وتراخى هيبة الدوله) لا علاقة له بصلاة المسيحيين حتى يصرخوا هصلى هصلى مهما حصلى, ومن منعك من الصلاة أيها الغاضب المضطهد؟هل قام الفلاحون(المسلمون او العرب كما تصفهم المواقع المسيحيه على النت) بما قاموا به بنية منع المسيحيين من الصلاه فى الدير أم بنية استرجاع الأرض كى يزرعوها؟ ان كانوا مخطئين فسيحكم القضاء بذلك, وسيعلن القضاء أيضا عن قاتل الفلاح(المسلم) وفى جواز حمل الرهبان للأسلحه فى مكان يفترض انه للعباده.

العرب جرب ... وأنا طفسطائى

أثناء تصفحى لبعض المدونات دخلت بالصدفه مدونه اسمها بنت القمر فى أول الأسبوع تقريباً ,كانت عامله بوست بمناسبة ذكرى نصر أكتوبر عباره عن صور لبعض قيادات الحرب مع تعريف بكل منهم , بوست لا يفتح مجالاً لأى نقاش , وعليه ومع عدم معرفتى بصاحبة المدونه دخلت التعليقات عشان أقولها كل سنه وانتى واحنا طيبين

. بس وانا بعلق لفت نظرى فى تعليق الأخت شهروزه الكلام ده

: حتى الآن ينكر علينا أجلاف الصحراء و براميل الخليج النصر والفخر فى أكتوبر

لأنهم لا يملكون تاريخا" يتفاخرون به

ولا حاضر يتباهون به

وبعدين لقيت صاحبة المدونه فى ردها على شهروزه بتقول الكلام ده

: مش بس براميل الخليج الي بيحسدونا علي اكتوبر وبينكروه علينا للاسف الشديد بعض الاخوة المصريين

اللي بيحبوا يتشيعوا لناصر ولو علي حساب اي شئ

بينكروا النصر وبينكروا المعجزه

فأنا قمت داخل كاتب الكلمتين دول

: أولا كل سنه واحنا طيبين

بس انا مش فاهم ايه حكاية اللى بيتحيزوا لناصر وبينكروا انتصار اكتوبر

مين قالك المعلومه الفشنك دى؟

الحرب بدأت فى يوليو 67 بمعركة رأس العش اصلا

ومفيش حد ينكر دور عبد الناصر فى اعادة بناء الجيش وحرب الاستنزاف

ومحدش يقدر ينكر دور السادات فى تكملة المشوار

رحمة الله على الاتنين

هو احنا لازم نبقى فريقين فى كل حاجه حتى فى الفرحه؟

وكمان نحشر سيرة الخليج فى الموضوع

هما ساعدونا فى 73 وده كل الناس عارفاه

وبراميل وكلام بايخ مالوش لازمه

تقريبا عشان تبقى مثقف ومتنورلازم تشتم فى الخليج

على اساس انهم مش عرب ولا بنى ادمين يعنى

وده كان رد بنت القمر صاحبة المدونه عليا

: محمد الهنداوي

وحضرتك طيب

اول زياره وتقول علي معلوماتي فشنك!!!اشكرك بشده

لا في ناس متعصبه جدا لناصر وبتنكر نصر اكتوبر وشايفه انه مؤامره غربيه لاخراج مصر ما اللعبه السياسيه في الشرق الاوسط وتحييدها علي الاقل وفي مدونات قائمه بذاتها عشان تبخ الكلام دا انت بس اللي مش واخد بالك

تانيا انا نا انكرتش لا دور جمال عبد الناصر ولا ما اكمله السادات

تالتا

تلاخوه العرب مش براميل ولا حاجه دول ناس زوووق زوووق وهما بني ادمين زينا بس للاسف برضه حضرتك مش واخد بالك ان فريق مش قليل منهم بيكره المصريين وبرضه بينكروا النصر وخصوصا مش الخلايجه اقول لحضرتك انا دول الشوووام ودا من اقاءات ليا مع شوام كتير دا حتا واحد لبناني نعرفه دخل معانا في جدل ان اكتوبر دا لعبه بالنسبه لتحرير جنوب لبنان

ورغم ان المقارنه غير جائزه بين حرب شامله علي ارض مكشوفه وجبهه طويله ممتده الي حرب شوارع تعتمد علي الكر والفر ودا مع كامل احترامنا لحزب الله لكن الغيره بقا تعمل ايه فيها

علي فكره مسمعتش عن عبد الباري عطوان؟؟اهو دا صحفي فلسطيني كرس حياته للحقد علي كل ما هو مصري يا ريت حضرتك تبقا تتابعه واهلا بيك دايما بس من غير ما تشتبك مع الزوار الاخرين

تحياتي

أنا بقى جيت رديت على كلام بنت القمر الأخير ده فى عدد من النقاط

: قلتلها انها كررت تعبير البراميل فى ردها على شهروزه وده معناه انها موافقه عليه وانا متحفظ على وصف أى بنى ادم بهذا الوصف

. وقلتلها انه يُفهم من كلامها ان كل الناصريين او معظمهم بينكروا نصر أكتوبر وقلتلها ان محدش يقدر ينكر النصر العظيم الا لو كان أهبل وانه على حد علمى ان فيه مجموعه من الناصريين وغيرهم شايفين ان ما أخرج مصر من دائرة اللعبه هى كامب ديفيد وليس الحرب وان ما تحقق بالنصر العظيم أضاعته المفاوضات فى كامب ديفيد

. وكمان زعلت من تعبير (فشنك ) فانا قلتلها ان دى مش شتيمه وانا بالطبع لا أقصد اى اهانه وانما فشنك فى نظرى تعنى غير صحيح او غير حقيقى وهذا رأيى فى الجزء الخاص بكون الناصريين بينكروا نصر أكتوبر

وقالتلى انها اتهمتها بانها انكرت دور عبد الناصر فى الحرب وانا قلتلها عندى دى يعنى ما قصدتش كده دانا حتى قلت ان الحرب بدات فى عصر عبد الناصر بمعركة رأس العش وأكملها السادات بالنصر رحم الله الاثنين

بخصوص كره العرب لمصر فواضح من ردى انى لم اعترض ولم اوافق انا بس قلتلها انه فيه اكيد عرب بيكرهوا مصر وفيه كمان مصريين بيكرهوا مصر , بس انا ضد التعميم ولما نيجى نقول ان كل العرب ليهم رأى موحد فى موضوع ما يبقى لازم يكون فيه استطلاع رأى اتعمل وخرج بالنتيجه دى , وسألتها ان كان عندها استطلاع زى ده؟ لانها مثلا قالت ان الشوام بينكروا الحرب واستشهدت بواحد لبنانى فانا قلتلها ما يصحش نختصر الشوام فى واحد وبعدين السوريين الى حاربوا معانا عرب وشوام معقوله بينكروا الحرب؟

وحاولت تدينى مثال ان الفلسطينيين زى باقى العرب والدليل عبد البارى عطوان اللى بيهاجم مصر , وانا قريت للراجل فى القدس العربى وسمعته على الجزيره وبى بى سى العربيه كتير بيهاجم النظام المصرى ومش بيهاجم مصر وقلتلها ان مصر لا تختصر فى حكامها

. عاوز أفكركم انها قالتلى بلاش اشتباك مع باقى الزوار

انما مافيش مشكله ان الزوار دول يشتبكوا معايا ويشتمونى كمان , خد عندك كلام الأميره أوسه فى ردها عليا

: انت جاى تذاكر؟ بتكتب جزء من تعليق بنت القمر وترص شوية طوب بعده؟(لاحظ السخريه وتعبير الطوب فى وصف كلامى

) انت كده مش بتفند اراء الاخرين انت بتحاول تقمعهم ( شوفت ازاى؟ على اساس انى شايل مقمعه وانا داخل)

وبتسأل عن استطلاع على اساس انها معهد احصاء وسعادتك محلل سياسى؟ (برضه سخريه من سعادتى بس الاهم ان اللى يتكلم عن حاجه المفروض يجيب دليل ومادام هو مش معهد احصاء يبقى ما يتكلمش عن الاحصاءات)

وشرحتلى اد إيه ان العرب بيكرهوا مصر , ولو مش شايف يبقى دافن رأسى فى الرمل واحتمال تطلع عربان صغيره ( خفة دم واضحه طبعا) .

وشايفه ان لهجتى فى الحوار متدنيه (بس ما قالتش متدنيه عن ايه او بالنسبه لايه) وفيه ترفع ( وعلى حد علمى ان الترفع مش حاجه وحشه لانه دايما بنقول ترفع عن الصغائر انما الكبرياء او الغرور هو اللى مذموم) واصرار عجيب( وما قالتش برضه اصرار على ايه , على رأيى يعنى؟ وهل اصرارى على رأيى يحسب عليا ؟)

نكمل كلامها : انت جاى تدافع عن أكياس الجوافه المسماه عرب؟

نسيت أسألك جنسيتك ايه؟ ( التلميح السخيف والساقط هنا هو ما لم أتحمله وفكرنى على طول بعبد الله كما لومحمد على ابراهيم فى تعاملهم مع أى مخالف فى الرأى

) كلامك اعتراض من أجل الاعتراض (دخلت ضميرى) وانت سفسطائى ( ده أنا برضه

) ختمت بقى بقولها انا عنصريه ضد العرب لأن العرب جرب

جت بعدها الحاجه شهروزه تكمل بقى

: انا مش مذاكر تاريخ وعشان كده معرفش ان كلامهم صح

وبتنصحنى أروح شهرين أى دوله عربيه عشان اتأكد بنفسى لما ينادونى ب يا ابن الرقاصه او يدونى بالقلم على قفايا

وبتصحنى انى ادخل موقع العربيه نت و اتكلم عن مصر او انصر بتاعى(عشان اللبس هى اكيد تقصد جمال عبد الناصر على اساس انه بتاعى يعنى شوف الأسلوب ) وانا اشوف من التعليقات ان كلامهم عن العرب صح

. ختامه بقى مش مسك لا ده حاجه غير كده خالص من بنت القمر صاحبة المدونه

: محمد الهنداوي

بما ان معلوماتي فشنك وكلامي مرسل بلا دليل ودمي يلطش واحنا رمضان ومش طالبه مناكفه مع حد وانت واخداك القوميه والعروبه

فانا اشكرك علي مجهودك في تاني تعليق

وعلي زووقك المتناهي

واستلم من اختاي اوسا وشهروزة

لانه علي راي من قال مفيش فايده

كل سنه وانت زى ما انت

ما اعترضتش هنا على اشتباك الزوار معايا

وما ردتش على كلمه واحده من كلامى على اساس اننا فى رمضان ومعرفش لو مكناش فى رمضان كانت هتعمل ايه؟ وحتتين بقى من نوعية زوقك المتناهى (اللى هو مش محتاج تأكيد منها ولا انا محتاج منها شكر)

وانا واخدانى القوميه والعروبه وده صحيح وافخر به بس ما قلتليش هى وصاحباتها ايه اللى واخدهم بالظبط؟

واستلم من اختيها على طريقة عليه يا عيال , وبعدين تهنئه رقيقه من الاخت بنت القمر (كل سنه وانت زى مانت) ياستى وانتى وصاحباتك زى مانتوا برضه

هما بس فاتهم يفكرونى بالشيكات اللى باخدها من القذافى واللى كنت باخدها من صدام

. انا حبيت اعرض الموضوع ده اللى خلانى اكتشف ان اسلوبى متدنى , وانى بقمع الاخرين , وسفسطائى , وكلامى زى الطوب , ومش مصرى صحيح , وبدافع عن اكياس الجوافه وبراميل النفط أعداء الوطن . وكمان أجرب بما نى عربى وان العرب اللى أبوهم اسماعيل عليه السلام ومنهم سيدنا رسول الله (ص) كلهم جرب

. أرجوك ما تستعجبش لو دخلت مدونة شهروزه ولقيتها بتدافع عن الصحفيين شهداء الحريه وحقهم فى الاعتراض والنقد

. وأخيرا لو انا كنت غلطت فى أى كلمه يا ريت حد ينبهنى عشان اصلح الغلط , أما بخصوص الكلام اللى اتوجهلى فأنا أحتسبه عند الله

.

متضامن مع ابراهيم عيسى

أختلف مع ابراهيم عيسى كثيرا

ولا يعجبنى خط الدستور فى بعض الاحيان

ولكنى أتضامن معه فى محنته

او محنتنا جميعا

وهى بحق محنه لان البشائر تقول انه سيسجن هذه المره

ان كان قد اخطأ فليحاسب مهنيا بمعرفة النقابه

دعوه للتضامن معه

http://www.petitiononline.com/ibrissa2/petition.html

الهلال مع الصليب00كله اتوحد بالتعذيب

ضحية التعذيب فى المنصوره الاسبوع الماضى كان مسلما

وضحية التعذيب-برضه- فى العمرانيه جيزه كان مسيحيا

وحده وطنيه صحيح

*****

الكاريكاتير لعمرو سليم

بدون تعليق

الليله دى00قالتى قول00خليك معايا

بتكلم عن شريط عمرو دياب الجديد

بخلاف محمد منير اللى بيغنى للانسان وللحريه والوطن انا مقتنع ان محدش بيغنى خالص(بالمعنى اللى انا اعرفه للغنا)او بمعنى اصح محدش عنده مشروع او فكره بيحاول يوصلها من خلال اغانيه

ومع كده انا معجب بعمرو دياب من زاوية اصراره على انه ينجح ويستمر ويبقى مختلف لدرجة ان كل الناس بتستناه ينزل بحاجه جديده عشان يقلدوه او يسرقوه بمعنى اصح(يسرقوا الشريط نفسه او يسرقوا افكاره والحانه

ده حتى لما اعلن ان شريطه هيبقى اسمه خليك معايا ودى فعلا احلى اغانى الشريط افتكسوا بوستر بنفس الاسم

والحقيقه هو كان احلى من البوستر اللى هو عمله وطالع فيه مصيف على الاخر

اغانى الشريط كلها ما خرجتش عن الحب بين واحد وواحده اللى تقريبا استهلكت وزهقنا منها بمعانيها المختلفه وتقريبا ما عجبنيش غير اغنيتين هما الليله دى وخليك معايا

اغنيه تالته بقى لفت نظرى معناها وخصوصا انى فكرت فيه قبل كده وهى اغنية (قالتلى قول ) واحده بتصر ان حبيبها يحكيلها عن علاقته بواحده قبلها وانا كان فعلا حبها ولا لا

ولما تعرف انه حبها بتنجرح لدرجة انه بيندم انه كان صريح معاها ويقول ياريتنى قلت ما حبيتهاش

انا كنت سمعت مقوله بتقول ان الرجل يهمه ان يكون الاول فى حياة المرأه بينما المرأه يهمها ان تكون الاخيره فى حياته

بالنسبه لحتة الرجل دى فأنا متفق معاها بمعنى انه الرجل ممكن يرتبط بواحده كانت حبت واحد قبل كده او اتخطبت له او حتى اتجوزته بشرط انها تكون نسيته تماما وبيفرح اوى لو كان اول واحد فى حياتها

انما بالنسبه للمرأه فانا الصراحه مش عارف ان كان فعلا بيهمها بس انها تكون الاخيره حتى لو كان فيه قبلها حد ولا ايه

الحاجه الوحيده اللى بتفرح فى مصر

وللحرية شوق

عندما وافقت لجنة الاحزاب(من الاثار القليله الباقيه من العصر الحجرى) على خروج حزب الغد للنور دون انتظار لقرار المحكمه فى هذا الشأن(حيث قام ايمن نور باللجوء للقضاء بعد رفض اللجنه للحزب فى مره سابقه) تحدث بعضهم عن صفقة ما تمت بين نور وبين النظام((كالعاده فى هذه الظروف) ولم يمر عام حتى تكشف ما كان يدور فى الكواليس والكل يعرف ما ال اليه مصير نور الان

والان ندور فى نفس الحلقه التى حدثت كثيرا

التماس للقضاء بالافراج الصحى يرفض

واستنفاذ لجميع الوسائل القانونيه للافراج ولا نتيجه

حتى لا يتبقى الا العفو الرئاسى الذى سيهلل له الكثيرون باعتباره منحه من الاب كبير العائله

لا اتمنى لنور عفوا رئاسيا

بل اتمنى ان يخرج بحكم قضائى

الحريه لنور

بل الحريه لنا جميعا

وللجميع اهدى ابياتا لمحمود درويش من قصيده بعنوان عن انسان

يا دامى العينين والكفين

ان الليل زائل

لا غرفة التوقيف باقيه

ولا زرد السلاسل

نيرون مات

ولم تمت روما

بعينيها تقاتل

وحبوب سنبلة تموت

ستملأ الوادى سنابل

ما تقولش ايه اديتنا مصر00لأ هقول

ماتقولش ايه اديتنا مصر قول هندى ايه لمصر ده مطلع اغنيه مشهوره غنتها عليه التونسيه من مش عارف كم سنه كده انا ما بحبش الاغنيه دى خالص رغم كونها اغنيه وطنيه(وانا طبعا راجل وطنى) ورغم انها مشهوره اوى صحيح لازم نقول هندى ايه لمصر بس لازم برضه نقول ايه اديتنا مصر هى مصر دى مش امنا برضه؟ وهو مين المفروض يدى الاول؟ الام ولا الابن؟ ولو الام ما اديتش ابنها تستنى منه يديها ازاى؟ اى علاقه فى الدنيا لازم تكون تبادليه بمعنى اخد وعطا وده مش معناه انها تبقى علاقة مصلحه ابدا بس دى فطره فى الواحد وحكاية اللى بيحب بيدى وما يستناش ياخد دى متهيألى كلام افلام مالوش وجود فى الواقع مادمت بحبك هديلك بس انت كمان لازم تدينى والا هبطل احبك لو حد عنده رأى تانى ياريت يقوله ويقولنا مصر ادته ايه وهو هيديها ايه عن نفسى مصر ادتنى صحيح اقل من اللى حاسس انى استحقه منها بس حاسس انها كمان معذوره وظروفها صعبه اوى ومع كده انا بحبها اوى

يا بعض المدونين00شوية احترام

قبل أحداث القضاه الشهيره لم أكن اهتم بالمدونات او بالأصح لم أكن اعرف ما هى المدونات حتى تم القبض على بعض الشباب المتظاهرين دعما للقضاه واطلقت عليهم وسائل الاعلام(المدونون) وقتها تعاطفت معهم جميعا دون سابق معرفه بأى منهم ربما لتوافق موقفى مع موقفهم فى هذه القضيه بالذات من القضاه بدأت محاولتى للتعرف على ماهية هذه المدونات ودخلت اشهرها والتى كان صاحبها احد المعتقلين(المدونه تخصه هو وزوجته) فى الصفحه الاولى شاهدت صورته وامامه ازازة بيره-قلت ماليش دعوه دى حريه شخصيه- وبدات اقرأ اول تدوينه قريتها كانت بتوقيع زوجته-وكانت من الأباحه وقلة الادب لدرجة انها احتوت على كلمات ومن بينها عنوان التدوينه نفسه لم اعرف معناها الا بعد الاستعانه بصديق- وتوالت التدوينات التى لا تقل عنها وقاحه لو حاولت انقل بعض الكلمات من هناك لهنا بالتأكيد سأتهم بأشياء لا تليق وعندما يعلق احد القراء منتقدا الاسلوب ويقول انه كان بامكانك ان تعبر عن رأيك بطريقه أكثر ادبا يقوم صاحبنا صاحب المدونه يقوله وكان ممكن برضه اعبر بقلة ادب وانا اخترت قلة الادب انت ايه مشكلتك؟ فى الفتره الماضيه قام أحد القضاه برفع دعوى ضد الحكومه مطالبا اياها بغلق بعض مواقع النت من بينها بعض المدونات ومع اعتراضى على هذه المبدأ وهو مبدأ المصادره فى احيان كثيره الا ان ما يهمنى تسجيله فى هذه النقطه ما كتبه احد اشهر المدونين(وهو من أشرت اليه فى البدايه)داعيا المدونين للتضامن مع وزير الداخليه المره دى بس وباديا التدوينه باعتذار للقراء لانها خاليه من قلة الادب ولانه لن يشتم الحكومه -بالطبع لانه يدعو للتضامن معاها -ولن يشتم القاضى -ليس لانه محترم فالقاعده هى الشتيمه-ولكن عشان خاطر زمايله البسطويسى ومكى قد يرد البعض بان هذه حريه وما الى ذلك ولنفترض ان هذه هى الحريه ولكنهم لا يمارسونها فى بيوتهم حتى نقول هم احرار هم يمارسونها فى الفضاء الالكترونى وفى الشارع ويطالبون المجتمع ان ينحاز لاى منهم لو اتجنن فى مخ اللى خلفوه زى البتاع ده اللى اسمه كريم هم ينصبون انفسهم حماة للحريه ويعلنونها صريحه لا للمقدسات(وحط تحت مقدسات دى كل ما يخطر ببالك) انا لا يعجبنى مثلا ان يضع احدهم صورة ظابط شرطه ويكتب تحتها: هو دا ابن ال000اللى اخد منى الكاميرا مثلا حتى لو كنت انا اكثر انتقادا للظابط منه من متابعتى لاكثر من مدونه اجدهم يتجاوزون لدرجة شتم المصريين بالجمله كده بالفاظ من نفس العينه ولا اعرف الصراحه ان كانوا هم يفعلون ذلك وهم بلا اى سلطه ويضعون انفسهم فى خندق مكافحة الديكتاتوريه فماذا يمكن ان يحدث لو تبدلت الادوار مثلا ماذا سيفعلون ان عارضتهم انا وهم فى مكان من يعارضونه الان؟ هم يظنون خطأ ان من يعارض النظام القائم سيتعاطف بالضروره مع كل من يقول له لا بس ده مش شرط فهناك السئ والأسوأ والأشد سوءا فى كل الأحوال كما أن المودنون ليسوا حزبا ولا تجمعهم مبادئ مشتركه أسسوا عليها تجمعهم هذا فلم التشنج والتعصب لكل ما هو صادم ملاحظه أخيره فيه مجموعه منهم كل ما تحصل حاجه فى وسط البلد يقولك انا شفتها ومصورها بالموبايل وكنت هناك طب انت سيادتك بتشتغل ايه؟ شغال قاعد فى وسط البلد ولا ايه ظروفك؟ ولا بشتغلنا؟

لن أكون شاهد زور

أرفض

وسأقاطع

ولن أشارك فى المهزله

ولن أذهب يوم الاثنين

والوجع فى قلب مصر

اختلف مع كثير من مواقفك واتفق مع الكثير ايضا لكنى ابدا لم اشك فى وطنيتك ولا فى طهارتك طبيعى جدا ان يوشك قلبك على التوقف وانت تصرخ حرام عليكم البلد ضاعت اتهموك كثيرا بانك مباحثى وانك واجهه لاخرين من رجال الحكم وانك رجل الحكومه فى المعارضه ولم يقدموا لنا دليلا واحدا يفسر لماذا تسقط الحكومة رجلها دورتين متتاليتين فى الانتخابات ولماذا لم تنجح فى الدوره الاخيره الا عندما اصر القاضى ان يعلن النتيجه فور انتهاء الفرز مباشرة وعلى الملأ هم يدعون انهم يعارضون نظام الحكم وتلقائيا نفهم انهم يحبون الشعب ولكنك ويا للغرابه تفاجأ بهم يتهمون نفس الشعب بالغوغائيه والهمجيه اذا ما احتفل بفوز فى مباراة كره أو خرج فى مظاهره او احرق علم امريكا يتهمونه بانه شعب بتاع شعارات مع ان الثورات فى العالم كله قامت على شعارات والدستور فى كل الدنيا هو شعارات وكل القيم الجميله فى حياتنا هى شعارات ايضا يعيبون عليك انك لا تشتم الرئيس بينما لا يتحمل احد منهم ان تعترض على كلمة قالها-مع انه مش رئيس – لا اعرفك ولم اقابلك ابدا لكنى اخذك كمثال اريد من خلاله ان اتحاشى حالة الاستقطاب التى تسيطر على المجتمع الان اختلف معى كما تشاء ولكن لا تنفى وجودى ولا تحقر من شأنى ولا تفتش فى ضميرى مصطفى بكرىسلامة قلبك